Tékniku EDTL halo instalasaun eletrisidade iha área Bebora, Dili. Imajen TATOLI/António Gonçalves

DILI, 18 fevereiru 2021 (TATOLI)–Prezidente Konsellu Administrasaun Eletricidade de Timor-Leste, Empreza Públika (EDTL,E.P), Paulo da Silva, kompromete sei fornese enerjia eletrisidade ho di’ak ba konsumidór sira, maski dalabarak hasoru difikuldade iha terrenu.

“Ami-nia prezensa atu asegura direitu konsumidór ou kliente sira, tanba ne’e maka prodús enerjia hodi konsumidór sira iha direitu tuur iha naroman. Iha kondisaun barak ami sei halo, ezersísiu boot ida tanba ita-nia situasaun ne’ebé iha presiza hadi’a,” Prezidente EDTL,E.P hateten hafoin sorumutuk ho Primeiru-Ministru, Taur Matan Ruak, iha Palásiu Governu, kinta ne’e.

Notísia relevante: TANE husu EDTL proteje direitu konsumidór asesu liña eletrisidade

Direjente ne’e dehan, maneira hodi garante direitu konsumidór sira maka EDTL sei haree oinsá hadi’a atendimentu, nune’e bele fornese enerjia ho kualidade.

“Maibé ne’e la’ós fasil, hanoin ohin, aban rezolve, tanba ne’e hanesan problema komplexu maibé ami prontu atu haree saida mak bele halo, nune’e preokupasaun públiku bele tau konsiderasaun, la’ós iha tempu badak maibé neneik bele hadi’a,” nia promete.

Iha sorin seluk, EDTL simu ona karta hosi TANE Konsumidór, ne’ebé iha tempu badak sei iha enkontru atu iha esplikasaun relasiona ho situasaun distribuisaun enerjia eletrisidade.

Responsável empreza públika ne’e husu ba konsumidór sira tenke komprende uza enerjia eletrisidade no iha responsabilidade selu.

“Iha ilegál barak no la selu tan depois ko’alia barak, labele ezije de’it direitu maibé dever nu’udár sidadaun di’ak tenke kontribui,” nia akresenta.

Jornalista: Antónia Gusmão

Editora: Julia Chatarina   

PUBLISIDADEiklan

HAKEREK NO HATÁN

Please enter your comment!
Please enter your name here