Diretor CIGC, Brigadeiru-Jenerál, João Miranda 'Aluk Descartes' . Imajen TATOLI/Egas Cristovão

DILI, 16 fevereiru 2021 (TATOLI)—Diretór Sentru Integradu Jesatun Krize (CIGC, sigla portugés), Brigadeiru  Jenerál João Miranda ‘Aluk Descartes’ hamutuk ho Koordenadór Estadu Maiór Capitão-de-mar-e- Guerra, Donaciano da Costa Gomes ‘Pedro Klamar Fuik’, hasoru malu ho Primeiru-Ministru (PM), Taur Matan Ruak, hodi informasaun situasaun COVID-19 no seguransa iha área fronteira terrestre.

Iha loron 13 fevereiru, ekipa saúde deteta kazu pozitivu foun ida hosi feto timor-oan ho idade 28, hamutuk ho ninia oan feto kiik tinan ida fulan hitu, ne’ebé halo viajen hosi Atambua, Indonézia no tama ilegál mai Timór hosi área Memo, munisípiu Bobonaro, maibé bainhira to’o Maliana konsege aluga motór ojek hodi lori sira-na’in rua mai Dili.

Diretór CIGC hateten, PM bolu ekipa Sala Situasaun CIGC tanba hakarak hatene situasaun iha área fronteira terrestre, liuliu ba ema ne’ebé tama ilegál.

“Agora hosi parte Ministériu Saúde hahú halo teste ba ninia família sira no ema ne’ebé akompaña nia no entre sira ne’ebé la’o hamutuk rezultadu hatudu negativu, maibé teste seidauk hotu,” nia akresenta.

Notísia relevante: MS deteta tan timor-oan ida pozitivu COVID-19

Tanba ne’e, horiseik hosi Sala Situasaun fó ona indikasaun ba postu tátiku ne’ebé kolokadu iha fronteira terrestre, liuliu ba postu Polísia atu tau-matan ba movimentu ilegál atu ema bele kumpre kuarentena no teste hafoin bele ba uma.

“Maibé sempre iha espasu ne’ebé sira tenta aproveita tama. Tanba ne’e, indikasaun hosi Sala Situasaun atu asegura sira enkuantu seidauk halo teste,” nia dehan.

Entretantu, CIGC mós aselera prosesu destakamentu unidade territorial ne’ebé atu fó apoiu postu tátiku ho autoridade munisipál hodi bele asegura ema tama-sai ilegál sira liuhosi fronteira terrestre.

Unidade territoriál kompostu husi FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) hamutuk batallaun ida hodi reforsa seguransa iha liña fronteira Terrestre no tasi.

Iha sorin seluk, reuniaun Konsellu Ministru estraordinária segunda (16/02) aprova Projetu Rezolusaun Governu hodi deside bandu deslokasaun ema hosi munisípiu seluk ba munisípiu Bobonaro no Covalima.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here