Primeir-Ministru, Taur Matan Ruak, akompaña ho Ministru Asuntu Parlamentár no Komunikasaun Sosiál no tékniku sira, asina termu entrega sistema DTMB ho Emabaixadór Xina iha Timor-Leste, Xiao Jian Guo, iha suku Guiço, tersa (16/02). Imajen TATOLI/Antónia Gusmão

LIQUIÇÁ, 16 fevereiru 2021 (TATOLI)—Governu ofisialmente lansa ona sistema dijitál transmisaun multimedia terrestre (DTMB, sigla inglés) ba Rádiu Televizaun Timor-Leste, Empreza Públika (RTTL, E.P), ne’ebé antes ne’e uza sistema analog.

Asesór ba Asuntu Planu, Programa no Relasaun Forsa Traballu Ministériu Asuntu Parlamentár no Komunikasaun Sosiál (MAPKOMS), Graciano Pires dos Santos, haktuir, iha fulan janeiru bainhira set-top box (STB) hamutuk 30.000 to’o Timor-Leste, ekipa tékniku hahú kedas halo levantamentu dadus iha suku lima hanesan suku Guiço, Lisadila, Gugleur, Vatuboro no Leotola iha postu administrativu Maubara, munisípiu Liquiçá hodi rekolla uma-kain ne’ebé iha ona televizaun.

“Bainhira iha televizaun mak bele instala STB no antena hodi bele asesu ba sistema dijitál transmisaun. Nune’e, totál uma-kain ne’ebé asesu ona ba sistema dijitál iha suku lima ne’e hamutuk 300, ho totál benefisiáriu 1.864, kompostu hosi mane 940 no feto 924,” Tékniku MAPKOMS ne’e relata iha ámbitu seremónia lansamentu sistema dijitál RTTL,E.P iha suku Guiço, postu administrativu Maubara, munisípiu Liquiçá, tersa ne’e.

Notísia relevante: Tinan ne’e, MAPKOMS harii tan torre neen ba RTTL, E.P

Maski nune’e, ekipa iha terrenu hasoru difikuldade balun bainhira atu halo instalasaun, hanesan eletrisidade mate lakan iha área halo instalasaun iha sentru transmisaun Kutulau, ne’ebé prejudika transmisaun signal hodi redús velosidade serbisu tékniku sira iha terrenu.

“Hafoin lansamentu sistema dijitál ne’e, ekipa tékniku preparadu kontinua halo instalasaun STB ba munisípiu sira ne’ebé identifikadu ona,” nia akresenta.

Tuir estimasaun, programa ne’e bele kobre ba populasaun 200.000 mai kraik, iha postu administrativu Laulara, munisípiu Aileu, postu administrativu Railaco, munisípiu Ermera no posibilidade to’o ba villa antigu Ermera, postu administrativu Cailaco, munisípiu Bobonaro to’o Tunubibi inklui munisípiu Liquiçá ba postu administrativu tolu ho totál suku 78 to’o 90.

“Daudaun iha Timor Leste, sentru transmisaun tolu mak funsiona hanesan Biterlau iha Fatuahi, Kutulau iha Bazartete no torre sentrál iha Caicoli, ne’ebé instala ona ekipamentu sofistikadu sira hodi halo transmisaun dijitál, ne’ebé materiál sira hetan apoiu hosi Governu Xina no instala husi tékniku xinéz,” dehan Graciano Pires.

Materiál sira ne’ebé instala ona mak hanesan RTTL front-end systemmicrowave transmission systems, DTMB/DTMB-A transmission systems, electric power distribution systems, lightning protection systems, air conditioning systems , STB, training services, no seluk tan.

Enkuantu, padraun ne’ebé uza harii ekipamentu sira relasiona ho sistema DTMB, uza padraun Xina no Timor-Leste.

Torre transmisaun Biterlau ho Kutulau, téknikamente uza frekuénsia 2 hodi transmite programa ba kanál 22 ho forma televizaun dijitál ho kualidade a’as (HD-high definition) no programa standard definition (SD) iha DTMB ida no DTMB-A ida.

“Téknikamente hatudu katak sistema dijitál transmisaun foin bele kobre ba área balun de’it, maibé bainhira harii tan torre transmisaun 12 iha territóriu nasionál mak ita bele deklara desliga sistema analog,” Asesór MAPKOMS tenik.

Razaun Timor-Leste uza sistema DTMB

DTMB nu’udár teknolojia avansadu iha mundu ho sistema modulasaun Time-domain synchronous orthogonal frequency division multiplexing (TDS OFDM) ne’ebé di’ak liu kompara ho sistema tradisionál no ba dahuluk aplika kódigu low-density parity-check (LDPC) transmisaun dijitál terrestriál iha mundu.

Alende ne’e, sistema ne’e hetan rekoñesimentu internasionál no sempre hetan primeiro lugar iha teste dijitál terrestriál sira seluk no fásil hetan ekipamentu iha indústria sira tanba nasaun barak mak utiliza ona DTMB.

Antes introdús DTMB iha Timor Leste, sistema ne’e introdús ona iha Pakistaun, Laos, Kambodia, Kuba, Sri Lanka, no mós nasaun balun iha Áfrika.

DTMB hahú dezenvolve iha tinan 1999 liuhosi peskiza sientífiku hosi sientísta sira iha Xina hodi forma ekipa peskiza televizaun dijitál, nune’e dezenvolve no industrializa projetu ne’e inklui introdús mós iha territóriu nasionál Xina nian.

Hafoin dezenvolve-an maka’as iha tinan 2012, liña dijitál terrestriál kobre hotu iha territóriu Xina no iha tinan 2015 Xina hahú desliga sistema analog no ohin loron tama ona ho sistema dijitál.

Sistema analog implika prosesu dezenvolvimentu mídia komunikasaun 

Timor-Leste ninia lokál televizaun analog iha 13, ne’ebé área kobertura mós kiik no frekuénsia ida bele transmite de’it programa RTTL nian ida.

“Bainhira ita haree televizaun la moos ka haree hanesan rai-henek iha televizaun laran no nia lian ladún moos, hirak ne’e akontese tanba ekipamentu analog ne’ebé agora daudaun utiliza hela mós tuan loos ona, nune’e prejudika ba prosesu manutensaun no monitorizasaun,” esplika Asesór MAPKOMS, Graciano Pires.

Nune’e, sai preokupasaun ba populasaun ne’ebé hakarak haree televizaun dijitál ho kualidade a’as.

“Sistema analog implika prosesu dezenvolvimentu mídia komunikasaun iha Timor Leste. Tanba ne’e, sistema analog tenke troka ba sistema dijitál transmisaun multimedia terrestre,” nia katak.

Sistema televizaun dijitál modernu iha oin tolu hanesan, sistema dijitál televizaun satélite ne’ebé uza duni satélite hanesan daudaun RTTL ho GMN aluga hosi Telkom 4  ho kustu boot no fó mós difikuldade boot atu dezenvolve tan programa sira no susar atu kontrola utilizadór sira.

Enkuantu, sistema TV Kabel di’ak maibé ninia kustu operasionál mak boot tanba sistema instalasaun sei uza fiu (optical fiber plus HFC) nune’e bele kanaliza liña, ne’ebé presiza halo investimentu boot ka gasta osan boot.

“Maibé bainhira uza sistema dijitál televizaun terrestriál, maka sei uza forma dijitál ho teknolojia foun hodi simu liña ka signal dijitál husi torre transmisaun ho programa oin-oin no fásil tebes atu kontrola,” Tékniku MAPKOMS hatutan.

Kona-ba televizaun terrestriál dijitál iha mundu fahe ba kategoria haat hanesan ATSC standard iha Estadu Unidu Amérika, DVBT standard iha Europa, ISDB standard iha Japaun, no DTMB standard iha Xina, ne’ebé hetan ona rekoñesimentu husi Uniaun Internasionál ba Telekomunikasaun (ITU, sigla inglés), ne’ebé foti parte iha ajénsia espesializadu Organizasaun Nasaun Unida (ONU) hodi kontrola informasaun no teknolojia komunikasaun.

“Entre standard haat ne’e, avansadu liu mak DTMB tanba halo ona teste komparasaun ho standard tolu seluk iha Brazil, Venezuela, Peru, Ekuadór no fatin seluk tan,” nia akresenta.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here