Segundu Komandante PNTL Dili, Superintendente Euclides Belo, aprezenta evidénsia no suspeitu EMFC ne’ebé envolve kazu prodús kupon SDSB ilegál. Imajen Tatoli/Eugénio Pereira

DILI, 16 fevereiru 2021 (TATOLI)- Komandu Polísia Nasionál Timor-Leste (PNTL) liuhosi Servisu Investigasaun Kriminál Nasionál (SIKN) detein suspeitu mane ida ho inisiál EMCF ne’ebé envolve iha kazu prodús kupon falsu lotaria popular (SDSB, sigla Indonézia) ne’ebé utiliza lema kompañia lotaria RUDAL 1974 no Kompañia Beatford nia naran.

PNTL detein suspeitu iha domingu (10/02) iha nia rezidénsia iha área Aeroportu Comoro, Suku Madohi, Postu Administrativu Don Aleixo, Munisípiu Dili ho Númeru Rejistu Kriminál (NUK) 0080/21.

PNTL halo mós apreensaun ba kupon ilegál ho kuantidade block 1.217 ne’ebé suspeitu prodús hein halo distribuisaun, inklui mákina imprime kór metan ho marka Canon hamutuk tolu, mákina tesi surat-tahan tolu, laptop ida, no tinta hamutuk 15.

Notísia Relevante : MTKI-PNTL hahú diskute kalendáriu inspesaun ba jogu ilegál

Segundu Komandante PNTL Dili, Superintendente Euclides Belo dehan, suspeitu EMCF komete krime falsifikasaun dokumentu la’ós orijinál ho númeru rejistu kriminál 0080/21DICMR.

“Suspeitu prodús kupon Beatford ho ninia totalidade hamutuk 1.217, ne’ebé ita sita ho evidénsia no ekipamentu kompletu,” Euclides Belo hateten  ba jornalista iha Komandu PNTL, Dili, tersa ne’e.

PNTL halo identifikasaun ba suspeitu ninia atividade prodús kupon ilegál konsidera krime fó prejuizu ba Estadu, inklui naran di’ak kompañia sira ne’ebé halo atividade legál no konsidera suspeitu envolve mós krime esplorasaun ba jogu ilísitu.

PNTL sei kontinua rekolla nafatin informasaun hosi sasin sira hodi buka tuir mós informasaun kona-ba envolvimentu suspeitu balun ne’ebé deskonfia prodús mós kupon lotaria ilegál.

Jornalista   :  Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here