Diretór Sentru Formasaun Jurídika no Judisiáriu, Antonino Gonçalves. Imajen TATOLI/Egas Cristovão

DILI, 16 fevereiru 2021 (TATOLI)-Sentru Formasaun Jurídika no Judisiáriu (SFJJ) iha loron 12 fevereiru, foin lalais ne’e, fó ona formasaun lei foun Medida Preventiva no Kombate Korrupsaun (MPKK) ba juis sira hamutuk na’in-35.

Diretór SFJJ, Antonino Gonçalves, ba Agência TATOLI iha nia servisu fatin, tersa ne’e, informa objetivu formasaun ne’e atu aumenta juis sira nia koñesimentu no oinsá bele hatene juis sira nia obrigasaun tuir lei foun MPKK nian.

Notísia Relevante : Lei MPCC sei vigora iha loron 180 hafoin publikasaun

Nia hateten, matéria ne’ebé koloka mak ko’alia kona-ba introdusaun hosi lei, nia aplikasaun, no mós  deklara rikusoin ne’ebé juis sira mós sei deklara bainhira lei ne’e tama iha vigór.

Antonino Gonçalves, hateten SFJJ mós fó ona formasaun  refere ba diretór ho ofisiál justisa hosi tribunál sira no  planu sei hala’o ba defensór públiku no majistradu prokuradór karik iha pedidu.

Marsu, termina mandatu

Diretór Sentru Formasaun Jurídika no Judisiáriu (SFJJ), Antonino Gonçalves, nia mandatu sei remata iha loron 9 fulan marsu, tinan ne’e.

“Tinan tolu  ha’u asume diretór hahú iha marsu  2018 to’o agora, tanba ne’e sei hotu iha loron 9 marsu, tinan ne’e,” diretór SFJJ, Antonino Gonçalves, informa.

Nia hateten, Konsellu Superior Majistradu Judisiál ne’ebé lidera direita hosi Tribunál Rekursu (TR) mak sei hili ka nomea kandidatu ida sai Diretór SFJJ. No lei fó dalan karik iha konfiansa bele renova mandatu tinan tolu tan ba diretór atuál hodi lidera Sentru Formasaun Jurídika no Judisiáriu.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here