Xefe Suku Guiço, Liberato Araújo Nunes. Imajen/amídia MAPKOMS

LIQUIÇÁ, 16 fevereiru 2021 (TATOLI)—Governu ofisialmente opta sistema dijitál transmisaun multimedia terrestre (DTMB, sigla inglés) ba Rádiu Televizaun Timor-Leste, Empreza Públika (RTTL,E.P), maski seidauk kobre iha territóriu tomak.

Lansamentu sistema dijitál ne’e realiza iha suku Guiço, postu administrativu Maubara, munisípiu Liquiçá.

“Espera RTTL,E.P bele ajuda influénsia desizaun ukun-na’in sira ba interrese Estadu no públiku, tuir mai ajuda mós muda karatér sidadaun no nasaun nian, estimula no eleva koñesimentu ho baze kompeténsia liuhosi informasaun tuir papél mídia hanesan eduka, informa no diverte. Hahú ohin ba oin ita tau nafatin konfiansa ba ita-nia Governu no Estadu atu dezenvolve ita-nia rain no husu ba ita hotu atu kolabora nafatin ho RTTL,E.P,” Xefe Suku Guiço, Liberato Araújo Nunes, hateten liuhosi diskursu iha seremónia lansamentu sistema dijitalizasaun RTTL,E.P iha suku Guiço, tersa ne’e.

Notísia relevante: Lansa sistema dijitalizasaun, PM Taur enkoraja RTTL,E.P dezenvolve-an

Nia konsidera, lansamentu ne’e importante no hanesan loron istóriku ba povu Timor-Leste tomak iha rai-laran no iha diáspora, liuliu suku Guiço.

“Marka istória mídia Timor-Leste tanba ita iha istória no dezafiu rasik. Maski nune’e, hanesan nasaun no povu, Timór tenke ba oin,” nia akresenta.

Tuir nia, rezultadu komprimisu maka Governu dijitaliza mídia RTTL,E.P.

“Nu’udar sidadaun ita orgullu. Ho nune’e, bainhira lansamentu ne’e realiza labele sai de’it seremónia ida hodi orgullu de’it, maibé sai duni lian ba lian laek sira, promove partisipasaun sidadaun ba dezenvolvimentu no haklaken pás no armonia sosiál,” Autoridade suku akresenta.

Iha fatin hanesan, abitante suku Guiço, Pascoal Ximenes, agradese tanba hetan ekipamentu hanesan receiver no antena hosi Ministériu Asuntu Parlamentár no Komunikasaun Sosiál (MAPKOMS) hodi uza akompaña notísia sira, tantu iha rai-laran no rai-li’ur.

“Nu’udar komunidade, bainhira ami simu sasán sira ne’e, ami kontente tebes tanba balun ne’ebé iha osan bele hola parabola hodi haree notísia sira, maibé ami laiha, entaun Governu fó no ami agradese, ami promete kuidadu sasán sira ne’e,” Parcoal promete.

Hafoin lansamentu sistema dijitál ba televizaun, Primeiru-Ministru, Taur Matan Ruak, akompaña mós hosi Ministru Asuntu Parlamentár no Komunikasaun Sosiál, Francisco Jerónimo no Embaixadór Xina iha Timor-Leste, Xiao Jian Guo, inklui ekipa tékniku sira hala’o vizita ba komunidade sira ninia uma ne’ebé hetan fasilidade hodi haree direta rezultadu apoiu ne’ebé Governu hamutuk ho Embaixada Xina oferese.

Ho set-top box (STB) hamutuk 30.000 ne’ebé daudaun iha, ekipa tékniku halo ona instalasaun iha suku lima hanesan suku Guiço, Lisadila, Gugleur, Vatuboro no Leotola iha postu administrativu Maubara, munisípiu Liquiçá, ne’ebé totál uma-kain ne’ebé asesu ona ba sistema dijitál iha suku lima ne’e hamutuk 300, ho totál benefisiáriu 1.864, kompostu hosi mane 940 no feto 924.

Tuir estimasaun, programa ne’e bele kobre ba populasaun 200.000 mai kraik, iha postu administrativu Laulara, munisípiu Aileu, postu administrativu Railaco, munisípiu Ermera no posibilidade to’o ba villa antigu Ermera, postu administrativu Cailaco, munisípiu Bobonaro to’o Tunubibi inklui munisípiu Liquiçá ba postu administrativu tolu ho totál suku 78 to’o 90.

Daudaun iha Timor Leste, sentru transmisaun tolu mak funsiona mak hanesan, Biterlau iha Fatuahi, Kutulau iha Bazartete no torre sentrál iha Caicoli, tanba ne’e iha tinan ne’e sei harii tan torre neen no tinan tuir mai harii tan neen, nune’e sistema DTMB bele tama iha territóriu Timór tomak.

Jornalista: Antónia Gusmão

Editora: Julia Chatarina  

HAKEREK NO HATÁN

Please enter your comment!
Please enter your name here