Polísia Bobonaro halo pasa revista ba transporte sira atu tama no sai hosi Munisípiu Bobonaro. Imajen Tatoli/Eugénio Pereira.

DILI, 16 fevereiru 2021 (TATOLI)—Diretór Forum Organizasaun Naun Governamental Timor-Leste (FONGTIL), Daniel Santos do Carmo, hateten Governu no Estadu Timor-Leste halo ona medida prevensaun barak maibé tenke haforsa liután hodi satán COVID-19 atu labele iha transmisaun lokál iha Timor-Leste.

Notísia Relevante: Pasiente COVID-19 na’in-ida rekoperadu

“Ita hotu hatene, COVID-19 konsideradu ona sai pandemia tanba afeta ona ba ema tomak iha mundu. Ema balun infetadu direta hosi virus ida-ne’e. Barak mós sofre konsekuénsia sósiu ekonómiku hosi kazu ne’e. Governu halo ona medida prevensaun barak maibé presiza haforsa liután hodi satán COVID-19 atu labele iha transmisaun lokál iha Timor-Leste,” Daniel Santos do Carmo hateten iha konferénsia imprensa ne’ebé hala’o iha salaun FONGTIL, Caicoli, Dili, tersa ne’e.

Maske nune’e, nia hatutan, nu’udar sosiedade sivil kontinua apresia ba servisu Governu nian ne’ebé liga ho pandemia COVID-19 iha Timor-Leste.

“Ami apresia ba progresu servisu ne’ebé Governu halo hamutuk ho liña frente hanesan médiku, pesoál saúde, PNTL no F-FDTL, no mídia tanba liuhosi liña koordenasaun ne’ebé di’ak konsege fó atendementu ba sidadaun sira iha kuarentena, izolamentu to’o iha prosesu reintegrasaun. Ami mós apresia ba parseiru dezenvolvimentu sira hotu ne’ebé fó ona sira ninia kontribuisaun morál no materiál ba Estadu Timor-Leste hodi prevene no kombate surtu COVID-19,” nia hatutan.

Ho asuntu ne’e, FONGTIL afirma ba públiku katak liuhosi enkontru membru sosiedade sivil hanesan FONGTIL, BELUN, rede TLCE, CGT no RFTL, BES-TL, La’o Hamutuk, AJAR, MDI, OXFAM, rede HASATIL no ativista sosiedade sivil, hodi deside no estabelese ekipa voluntáriu sosiedade sívil nian ba apoiu servisu ho objetivu atu apoiu servisu sensibilizasaun ba komunidade relativamente ba esforsu nasionál prevensaun COVID-19.

“Sosiedade sívil hola pozisaun ida-ne’e tanbá kazu ativu COVID-19 dezignadamente kazu detetadu sira-ne’ebé maihosi pasajen ilegál iha país. Nune’e, kuida saúde públiku populasaun nian no impede transmisaun lokál ka komunitária iha territóriu Nasionál,” nia dehan.

Ho kestaun hirak ne’e, FONGTIL husu ba Guvernu atu haforsa liña fronteira liuhosi mobiliza involvimentu komunidade nian, hodi apoiu forsa rua PNTL no F-FDTL hodi kontrola movimentu ilegál.

Aleinde ida-ne’e, nia relata mós ba Guvernu atu lockdown ba Munisípiu Bobonaro, Covalima no RAEOA tanba área fronteira hodi komunidade halo movimentu ilegál. Ida-ne’e, nia dehan, atu asegura nafatin disponibilidade ai-han no materiál sanitária ba komunidade iha Munisípiu Bobonaro, Covalima no RAEOA hodi koresponde nesesidade báziku hodi la prejudika komunidade durante periodu lockdown.

Diretór FONGTIL husu ba Guvemu atu aplika teste masál ba populasaun hotu iha Munisípiu Bobonaro, Covalima no RAEOA, no ba Parlamentu Nasionál atu halo desizaun ho seriedade hodi halo ona vasina ba sidadaun ho obrigatóriu no fahe informasaun kredível ba komunidade kona-ba importánsia hosi vasina.

Nia apela ba líder polítiku, lider instituisaun no autoridade hotu iha Timor-Leste atu hasai deklarasaun ruma ho kuidadu tanba bele fo influénsia ba komunidade atu la kolabora ho Guvernu liuhosi medida sira-ne’ebé Guvernu hasai hodi mitiga no prevene COVID-19 iha Timor-Leste.

“Husu ba Guvernu liuhosi Ministériu Interiór no Ministériu Defeza atu fasilita fasilidade teknolójia hanesan Drone ba PNTL no F-FDTL atu kontrola movimentu ilegál iha fronteira,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here