Sekretária Estadu Igualdade no Inkluzaun (SEII), Maria José da Fonseca Monteiru de Jesus hamutuk ho organizasaun KOICA, UN Woman, UNDP, UNFPA, no IOM lansa projetu 'Hamutuk Ba Igualdade' atu prevene no atende violénsia bazea ba jéneru iha Timor-Leste. Imajen TATOLI/Osória Marques.

DILI, 16 fevereiru 2021 (TATOLI)—Governu Korea  liuhosi  organizasaun Korea International Corporation Agency (KOICA) apoiu Timor-Leste liuhosi projetu “Hamutuk ba Igualdade” ne’ebé sei implementa durante tinan haat nia laran.

Sekretária Estadu Igualdade no Inkluzaun (SEII), Maria José da Fonseca Monteiro de Jesus, hateten KOICA fó apoiu Timor-Leste ho orsamentu millaun $7.7 ne’ebé sei implementa iha munisípiu haat mak hanesan Dili, Baucau, Covalima no Rejiaun Administrativu Espesiál Oé-Cusse, Ambeno (RAEOA).

“Lansamentu projetu ‘Hamutuk Ba Igualdade’ ne’e prevee ho montante millaun $7.7 hosi  Governu Korea liuhosi organizasaun KOICA iha TL ba projetu tinan haat nian no sei hahú tinan ne’e. Nasaun Unida fó apoiu ba TL ho orsamentu rihun $600,” Maria José da Fonseca Monteiro de Jesus hateten ba jornalista sira hafoin halo lansamentu ba projetu ‘Hamutuk Ba Igualdade” iha kampaun UN Woman, Caicoli, Dili, tersa ne’e.

Maria José da Fonseca Monteiro de Jesus hatutan, ohin, KOICA hamutuk ho Ajénsia Nasaun Unida haat hanesan UN Women, UNDP, UNFPA, no IOM lansa projetu ‘Hamutuk Ba Igualdade’ atu prevene no atende violénsia bazea ba jéneru iha Timor-Leste.

“Liuhosi lansamentu ne’e hodi hasa’e esforsu ba feto no labarik feto sira iha Timor-Leste, hodi goza sira-nia direitu ba moris livre hosi violénsia bazeia ba jéneru no hetan asesu ba servisu esensiál sira ho kualidade,” nia dehan.

Lansamentu ne’e, nia hateten, kolabora ho liña ministériu xave sira inklui organizasaun sosiedade sívil ne’ebé servisu iha violénsia bazeia ba jéneru no servisu sira hosi parte saúde.

Aleinde de ida-ne’e, nia dehan sei kolabora hamutuk ho parte justisa nian inklui halo monitorizasaun no komunikasaun kona-ba violénsia iha espasu públiku no privadu sira, no aborda violénsia bazea ba jéneru iha kontestu ba redusaun risku dezastre.

Tuir nia, projetu ne’e asina iha 23 novembru 2020 no benefisiáriu direta besik rihun 200. Projetu ida-ne’e, apoiu diretamente hosi KOICA no tulun hosi nasaun sira seluk hodi atinje Objetivu Dezenvolvimentu Sustentável (ODS) númeru 5 kona-ba igualdade jéneru.

Governante ne’e haktuir, violénsia bazea ba jéneru hasoru labarik feto no feto sira sei sai nafatin problema boot iha Timor-Leste. Tanba, nia dehan, atu hakotu violénsia ne’e la’ós buat fasil ida maibé presiza apoiu hosi parseiru sira no garante katak orsamentu estadu sensivel mós ba jéneru.

Entretantu, Embaixadór Korea iha Timor-Leste, Kim Jeong hateten haree ba pandemia COPID-19 ne’e, grupu vulneravel sira hanesan sobrevivente hosi violénsia bazea ba jeneru ne’e sai marjinalizadu liután.

“Tanba ne’e, liuhosi projetu ida-ne’e, ita sei promove projeitu ne’e ho mehi atu kria mundu ida-ne’ebé seguru ba ema hotu, iha ne’ebé violénsia sei lamosu tan iha kualker situasaun,”  Embaixadór ne’e hateten.

Embaixada Korea iha Timor-Leste hola parte iha atividade apoiu iha área oioin hanesan edukasaun, saúde, igualdade jéneru no hetan kapasitasaun liuhusi KOICA.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here