Diretóra Jéral Asuntu ASEAN, Ministériu Negósius Estranjeirus no Kooperasaun (MNEK), Milena Rangel. Imajen Tatoli/Egas Cristovao

DILI, 16  fevereiru 2021 (TATOLI) – Diretora Jerál asuntu ba ASEAN, Milena Rangel, informa nasaun sira membru ASEAN, liuhosi Konsellu Konsultivu  ba Negósiu ASEAN  (ABAC, sigla Ingles) komesa envolve ona Kamara Komérsiu no Indústria Timor-Leste (CCI-TL).

Nia informa,  enkontru foin lalais CCI-TL aprezenta ba nasaun membru sira ASEAN mak hanesan base legal organizasaun nian, lei balun ne’ebé mak regula organizasaun, oportunidade no área potensiál ruma ba investimentu.

Notísia Relevante : CCI-TL partisipa reuniaun virtuál ASEAN-BAC

“Konsellu Konsultivu  ba Negósiu ASEAN realiza enkontru anuál liuhosi dalan virtual no konvida mós Timor-Leste. Nune’e, ABAC mós konfirma katak kontinua konvida mós Timor-Leste partisipa iha Joint Business Council (JBC),”   Milena Rangel informa ba Agência TATOLİ, iha nia knaar fatin, MNEK, Dili, foin lalais ne’e.

Nia dehan, iha enkontru sira ne’e  ASEAN kontinua hatudu sira-nia prontidaun atu konvida nafatin Timor-Leste iha enkontru tuir mai.

Hatán kona-ba bainhira mak realiza tan enkontru komunidade emprezariál nasaun membru ASEAN ho CCI-TL, Milena Rangel hateten depende fila fali ba konvite hosi ABAC.

“Ha’u hanoin buat ne’ebé importante iha enkontru, foin lalais ne’e, mak ASEAN komesa envolve ona Timor-Leste iha atividade negósiu  nian, nune’e ita konsidera hanesan pasu importante ida ba Timor-Leste ninia adezaun ba ASEAN,” nia hateten.

Nia dehan, ho enkontru foin lalais nee loke mós oportunidade ba setór privadu sira atu envolve atividade negósiu ASEAN nian, prosesu adezaun la’ós de’it ona entre Governu Timor-Leste ho nasaun membru sira ASEAN nian.

Nia dehan, iha tempu liubá Timor  la hetan oportunidade sira hanesan ne’e, maibé foin lalais sira hato’o ba Timor-Leste atu fó konsiderasaun ba Timor-Leste atu partisipa iha eventu sira hanesan ne’e.

“Ida-ne’e hanesan alkansa boot ida ba Timor-Leste nia prosesu adezaun ba ASEAN” tenik  Milena Rangel.

 Jornalista     : Nelson de Sousa

Editor            : Francisco Simões

HAKEREK NO HATÁN

Please enter your comment!
Please enter your name here