Diretór Ezekutivu ANAAA, Edmundo da Silva Viegas. Foto: UNILAB

DILI, 16 fevereiru 2021 (TATOLI)—Ajénsia Nasionál Avaliasaun Akreditasaun Akadémiku (ANAAA) kontinua hein pedidu hosi East Timor Coffee Institute (ETCI) Gleno-Ermera kona-bá kursu Lian Inglés ne’ebé presija hetan re-akreditasaun iha 2021.

Diretór Ezekutivu ANAAA, Edmundo Viegas hateten kursu haat hosi ETCI ne’ebé la hetan akreditasaun iha tinan 2018 no 2019 mak hanesan kursu Lian Inglés, Kontablidade, Jestaun Informátika no Jestaun Administrasaun Públika.

Notísia Relevante:ANAAA sei avalia kursu akreditasaun programátiku 50 iha IESPP 14

Parte ANAAA hein tanba kursu Lian Inglés ne’ebé la akreditadu iha 2018 presija hetan akreditasaun finál iha tinan ne’e kompara ho kursu tolu seluk ne’ebé foin hetan avaliasaun iha 2019.

“Kursu Inglés ne’ebé presija re-akredita mak la hetan akreditasaun iha tinan ne’e, bele konsidera kursu ne’e la ezisti ona,” Edmundo hateten ba jornalista Agência Tatoli via telefónika, tersa (16/02).

Nu’udár Ajénsia ne’ebé haree ba kualidade Instituisaun Ensinu Superiór Públiku no Privadu sira hein nafatin pedidu hosi ETCI atu hatene progressu preparasaun durante tinan rua.

Entretantu, dezde 2016 to’o 2019 ANAAA halo ona avaliasaun ba kursu hamutuk 105 hosi totál Universidade no Institutu Superiór Públiku no Privadu 14 iha Timor-Leste, kursu ida tenki taka no lima seidauk hetan akreditasaun.

Jornalista: Tomé Amado

Editór:  Cipriano Colo

HAKEREK NO HATÁN

Please enter your comment!
Please enter your name here