Segundu Komandante Operasaun Sala Situasaun COVID-19, Brigadeiru Jenerál, João Miranda “Aluc Descartes” no Koordenadór Estadu Maiór CIGC, Kapitaun Mar-de-e- Guerra, Donaciano Costa Gomes Pedro “Klamar Fuik” ho ekipa halo vizita ba Munisípiu Covalima. Imajen/IDN-TL

DILI, 15 fevereiru 2021 (TATOLI)- Ekipa Sentru Integradu Jestaun Krize (CIGC) identifika suku ualu (8) iha Munisipiu Covalima risku ba abitante sira halo movimentu ilegál ne’ebé posivel bele importa COVID-19 hosi viziñu Timor Osidentál-Indonézia mai Timor-Leste.

Autoridade seguransa no munisipál iha area jurisdisaun  Covalima nian relata ba ekipa Sentru Integradu Jestaun Krize (CIGC) ne’ebé lidera hosi Segundu Komandante Operasaun Sala Situasaun COVID-19, Brigadeiru Jenerál, João Miranda “Aluc Descartes” no Koordenadór Estadu Maiór CIGC, Kapitaun Mar-de-e- Guerra, Donaciano Costa Gomes Pedro “Klamar Fuik” katak difikuldade boot ne’ebé parte-sira enfrenta maka kontrola abitante sira tama ilegálmente liuhosi suku ualu ne’ebé poténsia tebetebes  ba movimentu ilegál.

Notísia Relevante : Timoroan ida pozitivu COVID-19, kazu aumenta ba 40

Segundu Komandante Operasaun Sala Situasaun COVID-19, Brigadeiru Jenerál João Miranda “Aluc Descartes” husu ba parte seguransa no autoridade lokál atu servisu hamutuk hodi sosializa informasaun ba povu hodi evita movimentu ilegál sira.

“Ita hotu hanesan autoridade Estadu iha devér morál tau konsentra ba evita atividade  ilegál liuhosi sosializasaun no Konsensializasaun atu komunidade sira tenke kontribui ba kontra propagasaun surtu COVID-19 liuhosi labele halo movimentu ilegál,” Brigadeiru Aluc hateten iha nota imprensa ne’ebé Agência TATOLI simu hosi ekipa CIGC, segunda ne’e.

Iha fatin hanesan, Koordenadór Estadu Maiór CIGC, Kapitaun Mar-de-e- Guerra, Donaciano Costa Gomes Pedro “Klamar Fuik” dehan, vizita ba Covalima no Bobonaro hodi rekolla informasaun no dezafiu sira hodi aprezenta fila fali relatóriu ba Primeiru-Ministru, Taur Matan Ruak.

Klamar Fuik dehan, luta hasoru ameasa COVID-19 la’ós haree de’it ba seguransa sira, maibé presiza hetan apoiu hosi povu iha liña fronteira liuhosi meiu evita halo movimentu ilegál.

Administradór Munisípiu Covalima Afonso Noguiera Nahak, hato’o agradese ba vizita ekipa hodi rona direita problema ne’ebé sira enfrenta hodi buka rezolve inklui reforsa seguransa iha liña fronteira sira.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here