Sekretáriu Estadu Ambiente, Demétrio de Amaral de Carvalho. Imajen TATOLI/Egas Cristovão

DILI, 15 fevereiru 2021 (TATOLI)Relasiona ho implementasaun Dekretu-Lei kona-ba eliminasaun no importasaun saku plastiku, uzu úniku, embalajen no objetu husi materiál plástiku, ne’ebé hahú implementa iha loron 23 janeiru 2021, maka Sekretaráriu Estadu Ambiente, Demétrio do Amaral de Carvalho, informa daudaun ne’e sei foku liu ba kombate bee mililitru 500 no embalajen falun hahan.

“Ita-nia estratéjia face out, foku liu ba embalajen sira ne’ebé ita hakarak kombate to’o zero hanesan embalajen uzu úniku no falun …. (nasi bungkus) nia fatin inklui bee mililitru 500,” Sekretáriu Estadu informa ba ba Agência TATOLI, foin lalais ne’e, iha ninia knaar fatin, Bebora.

Dekretu-lei ne’e promulga ona husi Prezidente Repúblika, Francisco Guterres ‘Lú Olo’, iha loron 23 setembru 2020.

SEA hasai ona diretiva operasionalizasaun ba dekretu-lei númeru 37/2020, ne’ebé iha númeru dahuluk hateten matéria atu kombate dahuluk. 

Governante ne’e rekoñese enfrenta situasaun balun hanesan empreza balun sei iha stock plástiku iha armazen molok promulga dekretu-lei ne’e.

SEA hasai diretiva operasionalizasaun ne’ebé ho kálkulu atu fó faze tranzitóriu ba entidade komersializasaun embalajen sira iha Timor-Leste. 

“Ita komunika ona ho Autoridade Aduaneira (AA)/Alfándega atu fó lista sira ne’ebé hanesan alvu atu elimina no proíbe importasaun embalajen uzu úniku no nasi bungkus sira,” nia akresenta.

Governu mós proíbé importa no notifika ona estabelesimentu fábrika produsaun embalajen uzu úniku sira iha Timor-Leste.

Estratéjia seluk, maka sei prodús lista provizóriu embalajen ba produsaun bee, plástiku falun masin midar, kafé no seluk tan tuir dekretu-lei.

“Ita aplika ba entidade ne’ebé importa plástiku embalajen sira iha lista estratéjia face down ho aplikasaun taxa 30% tuir bareirra fiskál ne’ebé lei haruka hanesan rendimentu Estadu nian hodi halo melloramentu ba ambiente,” nia akresenta.

Tuir Sekretáriu Estadu, bainhira aplika dekretu-lei iha implikasaun la’ós de’it ba ambiente, maibé iha mós ba estabilidade ekonómiku nasionál tanba sei koordena ho empreza sira atu harii no hahú prodús saku sira ne’ebé bele halo subtituisaun iha merkadu.

“Ita presiza empreza barak tanba iha oportunidade negósiu ne’ebé bele halo investimentu halo saku ho materiál ai-farina, embalajen tradisionál sira, saku verde ka spunbond bag sira,” nia hatutan.

Nune’e, nia husu ba entidade hotu atubele kontribui ba polítika zero plástiku hodi salva ambiente no halo Timor-Leste sai ezemplu kombate plástiku iha mundu inklui nu’udar nasaun ne’ebé neutrál plástiku.

“Ba inan-aman sira ne’ebé mak ba merkadu ka loja, presiza lori rasik ita boot sira-nia bote no bornál. Uza saku degreadável atu evita uza saku embalajen sira restaurante no ba sira ne’ebé fa’an hahan, evita atu uza styrofoam (kaixa falun hahan/kotak nasi)kontribui salva ita-nia planeta no rai hodi bele sai distinasaun turizmu livre plástiku,” nia enkoraja.

Entidade ne’ebé sei monitoriza dekretu-lei ne’e maka SEA, Ministériu Koordenadór Asuntu Ekonómiku (MKAE), Autoridade Inspesaun Fiskalizasaun Ekonomia Sanitária (AIFAESA), TrandeInvest, no Ministériu Finansa (MF) no Alfándega.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here