Iha maiu 1991, Delegasaun Juventude inklui Saudozu Metan Zebra ne’ebé lideradu hosi Eduardo Belo 'Gatot' ho koñesimentu Komandante Em Xefe Kay Rala Xanana Gusmão, hodi hasoru malu ho Sub Xefe Estadu Maiór David Alex iha Suku Samalari, Postu Administrativu Baucau Vila, Munisiu Baucau. Imajen/Espesiál.

“Ami sei iha raan atu nakfakar nafatin. Ami sei iha kulit atu naklees nafatin. Ami sei iha ruin atu tohar nafatin. Ami sei iha u’at atu kotu nafatin, bainhira ami-nia direitu ba Ukun Rasik-Aan imi lakohi rekoñese,” Julião Augusto Mausiri ‘Metan Zebra’.

DILI, 15 fevereiru 2021 (TATOLI)—Liafuan naisin iha leten ne’e sai hanesan filozofia no prinsípiu ida-ne’ebé saudozu Julião Augusto Mausiri “Zebra Metan” hahí no hanai durante nia involve aan sai hanesan juventude rezisténsia ida-ne’ebé firme no hadomi nia rai-lulik Timor-Leste ne’e liu fali ninia aan rasik.

Notísia Relevante: Saudozu Mausiri nia istória funu-nian sei la lakon

Mehi ida de’it. Bainhira ninia rai-lulik ne’e mak seidauk hetan nia direitu hanesan rai ida-ne’ebé lulik, Zebra Metan tuba rai metin hodi tebe rai katak raan bele nakfakar, kulit bele naklees, ruin bele tohar, no u’at bele kotu hotu mós, nia firme nafatin luta ba Timor-Leste nia independénsia to’o raan ne’e maran mesa-mesak iha nia isin-lolon rasik.

Esperansa ida de’it. Biar ruin bele tohar no u’at bele kotu hotu mós la hamate ninia espíritu atu hamriik metin luta ba povu no rai-lulik Timor-Leste nia “Uku Rasik Aan”. Espíritu ida-ne’e lakan hanesan “ahu-knulu” ida iha nia laran, maske forsa Indonézia kaptura nia no halo torturasaun ba nia, nia firme no brani hodi hateten; “Imi la rekoñese ami-nia direitu ba Ukun Rasik Aan, ami sei la rende ba imi no luta nafatin”.

Bainhira invazaun hosi Forsa Indonézia, Zebra Metan ho idade tinan 10. Bainhira idade avansa ka tinan 17 ba leten, Metan Zebra hahú hakbesik-aan ba funu na’in sira-ne’ebé iha vila laran liuhosi Komite Sentrál FRETILIN (CCF-sigla portugés).

Ho motivasaun hosi funu na’in sira halo halo ‘Metan Zebra’ hakle’an liután nia koñesimentu ba funu ida-ne’e ho ninia partisipasaun rasik.

Nune’e konsiensializa no konsolida fila-fali bolsa rezisténsia iha sidade tomak hodi hamriik ho lian maka’as ida de’it hakilar ba mundu tomak “Pátria ou Morte, Resistir e Vencer” hodi fó tada ba komunidade internasionál katak direitu ba ukun rasik-aan Povu Maubere nian sei luta nafatin, hanesan mós direitu ukun rasik-aan povu Amerikanu, povu Indonéziu no rai sira seluk iha mundu.

Ho lian kro’at hateten nune’e; “Ami sei iha raan atu nakfakar nafatin. Ami sei iha kulit atu naklees nafatin. Ami sei iha ruin atu tohar nafatin. Ami sei iha uat atu kotu nafatin, bainhira ami-nia direitu ba Ukun Rasik-aan imi lakohi rekoñese,” Sekretária Meza Parlamentu Nasionál, Deputada Lídia Norberta dos Santos Martins, haktuir prinsípiu Metan Zebra ne’ebé previstu iha memória biografia, iha plenária Parlamentu Nasionál, segunda ne’e.

Biografia

Julião Augusto Mausiri ‘Metan Zebra’ moris iha Suku Camea, Postu Administrativu Cristo Rei, Munisípiu Dili, iha loron 17 juñu 1966. Julião Augusto Mausiri oan hosi Mausiri (matebian) no Clotilde Moniz (matebian). Julião Mausiri “Metan Zebra” nia espoza mak Olinda da Costa Kumau. Saudozu husik hela nia-oan na’in-haat kompostu hosi Viser Mausiri, Latoia da Costa Mausiri, Visal Carol Deus Mausiri no Vilson do Bikei Moniz Mausiri.

Metan Zebra hahú ninia estudu iha Ensinu Primária iha Sagrado Coração de Jesus, Becora (terçeira classe) iha 1975, Ensinu Pre-Sekundária iha 7 Becora iha 1983, Ensinu Sekundária númeru 01 Dili iha 1983-1985.

Metan Zebra kontinua nia estudu iha Eskola Téknika Vokasionál Fatumaca, Baucau, iha área Mekánika iha 1985-1986. Hafoin ne’e, Metan Zebra kontinua fali nia estudu iha Eskola Externato São José, Balide, Dili, iha 1986-1990. Bainhira funu ramata, iha era independénsia, Metan Zebra finaliza nia estudu iha Universidade da Paz, Fakuldade Direitu, iha 2011.

Saudozu Julião Mausiri “Zebra Metan”, hahú involve aan iha Organizasaun Juventude Katólika ka Asosiasaun Juventude Apoiu Mútua (AJUDAM) iha Parókia Sagrado Coração de Jesus Becora, Dili, iha 1983 no tama ba 1985-1986 envolve iha Eskuteiru Katóliku Agrupamentu Maránatha.

Metan Zebra kontribui maka’as liuhosi dedikasaun iha manifestasaun vizita Santo Padre João Paulo II iha Tasi Tolu, iha 12 outubru 1989 no iha manifestasaun ida tan ne’ebé hala’o iha Lecidere iha loron 4 novembru 1989.

Saudozu Metan Zebra nu’udár autór no portavós ba manifestasaun boot ida-ne’ebé hala’o durante loron tolu (3) nia laran hahú hosi 17,18, 19 janeiru 1990, hodi simu hasoru vizita Embaixadór Plenipotensiáriu Estadu Unidu Amérika, Jhon Monjo.

Iha manifestaun ne’e, saudozu hetan kapturasaun no detidu iha Satuan Gabungan Intelijen (SGI) durante oras lima nia laran no hetan torturasaun ne’ebé lori nia hetan kanek todan iha parte ulun tanba hetan pankada, no kanek iha isin-lolon tanba hetan baku, tuku, no tebe hosi membru SGI sira.

Saudozu Metan Zebra mós nu’udar joven persigidu no hetan protesaun hamutuk ho joven sira seluk iha Igreja Motael, Dili. To’o ikus, forsa militár indonézia sira asalta Igreja Motael iha loron 28 outubru 1991, ne’ebé ikus mai hamosu juventude loriku aaswa’in ida “Saudozu Sebastião Gomes” militár sira tiru mate. Trajedia ida-ne’e, lori hametin liután sira-nia kompromisu, nune’e to’o ikus mai hamosu trajédia ka masakre Santa Cruz 12 Novembru 1991. Asaun ida-ne’e,  nu’udar asaun ida-ne’ebé aas liu hodi fanu no loke komunidade internasionál nia neon no buka solusaun ba kauza povu maubere nia luta iha Timor-Leste.

Banhira hala’o atividade klandestina hirak ne’e, Metan Zebra buka sees-aan hosi inimigu hodi hala’o gerilla urbana iha Becora, Lecidere, Taibesi no Igreja Motael. Saudozu nia naran espesiál ida-ne’ebé padre sira baibain bolu mak ‘Entra Logo’.

Metan Zebra nu’udar membru mobilizadór, ajitadór no motór propaganda polítika iha organizasaun Organisação da Joventude e dos Estudantes de Timor-Leste (OJETIL). Saudozu nu’udar fundadór hosi Organisação Populár da Joventude Lorico Aaswa’in de Timor-Leste (OPJLATIL) iha 18 maiu 1992.

Iha maiu 1991, Delegasaun Juventude inklui Saudozu Metan Zebra ne’ebé lideradu hosi Eduardo Belo ‘Gatot’ ho koñesimentu Komandante Em Xefe Kay Rala Xanana Gusmão, hodi hasoru malu ho Sub Xefe Estadu Maiór David Alex Daitula iha Suku Samalari, Postu Administrativu Baucau Vila, Munisiu Baucau. Objetivu hosi hasoru malu ne’e halo koordenasaun no simu orientasaun hodi bele organiza juventude sira iha vila laran luta ba libertasaun nasionál.

Iha 1999, Metan Zebra, Mandati, Leandro Isaac, Mauhuno no Mauhudo, hetan konvite espesiál hosi Kay Rala Xanana Gusmão, simu orientasaun hodi halo sensibilizasaun ba inan-aman sira molok hala’o Konsulta Populár ka Referendu hodi bele “vota” iha loron 30 agostu 1999, atu hili “Ukun Rasik Aan”.

Metan Zebra nu’udar kandidatu ba membru Asembleia Konstituente hosi Partidu Demokrátiku (PD) iha lejizlatura dahuluk. Saudozu mós nu’udar Xefe Unidade Jurídiku iha Prizaun Becora, nu’udar mós ofisiál dirasaun promosaun no marketing iha Ministériu Turizmu, Komérsiu no Indústria (MTCI). Metan Zebra asume Xefe Unidade Jurídika iha MTCI to’o labele kontinua hala’o nia knar hanesan baibain tanba kondisaun saúde la permite.

Notísia Relevante: Saudozu “Mausiri” nu’udar éroi ba libertasaun nasionál

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here