Joven ida deskansa hela hafoin halo aktividade hili sasán uzadu hanesan kalen no besi-aat sira ne’ebé soe iha lixeiru Tibar, sesta (5 /2/2021). Imajen Tatoli/Antonio Goncalves.

DILI, 15 fevereiru 2021 (TATOLI)—Xefe Departamentu Reziduo Sólidu Urbana (RSU), João do Carmo de Fátima, hateten programa resiklajen ne’ebé Governu planu no hahú ona implementa iha 2016 liubá maibé to’o agora komunidade seidauk iha konsiénsia bainhira soe lixu.

Notísia Relevante: DNOU implementa programa pilotu resiklajen iha suku tolu

“Baihanira ita implementa tiha programa resiklajen hamutuk ho Munisípiu Dili, problema ne’ebé mak durante ne’e ita enfrenta iha terrenu mak ita-nia komunidade seidauk iha konsiénsia hodi tau keta-ketak lixu iha nia fatin,” João do Carmo de Fátima hateten ba Agência TATOLI iha nia knaar fatin, Colmera, Dili, segunda ne’e.

Tanba ne’e, nia dehan, presiza komunidade nia konsiénsia soe lixu iha nia fatin, nune’e empreza sira fasil rekolla no bele transforma ba resiklajen.

“To’o agora ita observa iha terrenu no nota katak laiha mudansa hosi implementasaun programa refere, tanba lixu la tau ba fatin bazeia ba formasaun ne’ebé mak ita fó ba sira.  Sira sei tau hamutuk nafatin bainhira ita-nia empreza balun ba foti kahor tiha,” nia hateten.

Nia hateten, suku ne’ebé mak Governu liuhosi Minsitériu Administrasaun Estatál (MAE) implementa programa resiklajen ne’e, iha redús uituan maibé problema mak lixu kontinua tau hamutuk iha fatin ida no seidauk bele separa lixu órganiku no an-órganiku.

Tuir nia, programa pilotu ba programa resiklajen ne’e implamenta ona iha Postu Administrativu rua hanesan Postu Administrativu Dom Aleixo mak iha Suku Kampung-Alor no Motael, Postu Adminsitrativu Vera Crus mak implementa iha Suku Colmera no Caicoli.

“Programa refere seidauk implementa hotu iha Dili laran tomak tanba orsamentu natón de’it hodi fasilita ba suku tolu ka haat. Tanba ne’e, ita la’o ho pilotu maibé iha futuru ita bele aselera di’ak liután,” nia dehan.

Nia dehan, ida-ne’e iha ligasaun ba dekretu-lei númeru 3/2016 (Estatutus daas Administradores Municipais, das Autoridades Municipais e do Grupo Tecnico Interministerial para a Decentralizacao Administrativa), kompeténsia Governu sentrál entrega ona ba munisípu sira no kona-ba orsamentu sira mak halo jestaun rasik.

“Hanesan atividade resiklajen no jestaun lixu nian, ne’e munisípiu mak bele hola desizaun tomak. Parte nasionál só halo lejislasaun hodi munisípiu hotu bele implementa tuir sira-nia programa,” nia esplika.

Notísia Relevante: Juventude Liquiça husu ba na’i-ulun sira atu aselera prosesu resiklajen

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here