Diretór Jerál EPEBER, Apolinário Serpa Rosa. Imajen/facebook.

DILI, 15 fevereiru 2021 (TATOLI)—Ministériu Edukasaun Joventude no Desportu (MEJD) fó ona orientasaun ba Diresaun Jerál Edukasaun Pre-Eskolár Ensinu Báziku no Ensinu Rekorrente (EPEBER) hodi hapara provizóriu atividade eskolár iha eskola 94 ne’ebé pertense ba Munisípiu Bobonaro, Covalima, Rejiaun Administrativa Espesiál Oe-cusse Ambeno (RAOEA) no Dili.

Diretór Jerál EPEBER, Apolinário Serpa Rosa hateten orientasaun ne’ebé nia simu hosi MEJD hato’o ona ba Diretór Serbisu Edukasaun Munisipál haat hodi hapara provizóriu eskola 28 iha Bobonaro, 33 iha Covalima, 32 iha RAEOA  no 1 iha Dili.

Notísia Relevante:Reuniaun KM: deside bandu deslokasaun munisípiu seluk bá Bobonaro-Covalima

“Iha Munisípiu Dili ita hapara provizóriu atividade ensinu aprendizazen iha eskola Ensinu Báziku Filiál Doque de Caxias Bemori, tanba identifika inan hosi estudante na’in-rua pozitivu COVID-19 ne’ebé ba halo lia iha Atambua Kupang ho ilegalmente,” Apolinário Serpa Rosa hateten ba jornalista sira iha serbisu fatin Vila Verde, segunda (15/02).

Diretór Jerál ne’e dehan, oras ne’e daudaun inan ne’ebé pozitivu COVID-19 iha ona sala izolamentu Vera Cruz no estudante na’in-rua ho sira-nia aman inklui alin kiik-oan ida, ekipa vizilánsia Ministériu Saúde asegura ona iha kuarentena atu halo observasaun durante loron 14.

“Agora daudaun ita hein hela rezultadu laboratóriu hosi MS kona-bá estudante na’in-rua ne’ebé iha hela kuarentena. Bainhira rezultadu pozitivu Ministru Armindo Maia mak sei foti desizaun hodi taka totál atividade eskola nian,” nia subliña.

MEJD foti desizaun hodi hapara provizóriu atividade eskolár atu salva estudante sira iha fronteira tanba durante ne’e ema barak halo movimentu ilegál, inklui inan ne’ebé oras ne’e pozitivu COVID-19 mai hosi fronteira ho transporte públiku, no diskonfia iha posibilidade mosu transmisaun lokál.

Notísia Relevante:Timoroan ida pozitivu COVID-19, kazu aumenta ba 40

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here