Rai-ko’ak ka gruta ne’ebé forsa Japaun sira obriga populasaun Bercoli sira ke’e iha Caibuilori, sai abrigu ba rai arma funu nian ne’e agora Kompañia COVEC sobu tiha ona. Imajen/Esepeiál.

DILI, 15 fevereiru 2021 (TATOLI)—Prezidente Autoridade Munisípiu Baucau, Olívio Freitas ‘Bou Lesa’, infroma Governu liubosi Sekretáriu Estadu Arte Kultura (SEAk) autoriza ona Kompañia Internasionál China Overseas Engineering Group hodi responsabiliza ba rai-ko’ak (gruta) Caibuilori ne’ebé kompañia ne’e taka tiha ona rai.

Notísia Relevante: Bou Lesa: “COVEC sobu sítiu istóriku ‘Gua-7’ ne’e laloos”

“Semana kotuk, Governu liuhosi SEAK mai to’o ami-nia fatin hodi haruka Kompañia COVEC ne’ebé halo estrada dirasaun Baucau-Viqueque nian tenke responsabiliza ba rai-ko’ak (gruta) tolu iha Caibuilori ne’ebé sira taka tiha ona ho rai. Fatin ne’e presiza ita proteje tanba fatin ne’e mós fatin istóriku Timor-Leste nian ne’ebé Japaun rai hela ba ita,” Olívio Freitas “Bou Lesa” hateten ba Agência TATOLI liuhosi telefónika, segunda ne’e.

Olívio Freitas hatutan, iha Caibuilori ne’e iha rai-ko’ak hamutuk ualu (8) maibé sira taka tiha ona rai-ko’ak tolu (3) no rai-ko’ak lima (5) mak nafatin hela, Maibé parte Governu liuhosi SEAK halo ona intervensaun no Kompañia COVEC sei hadi’a fila-fali hodi garante rai-ko’ak ne’e ninia orijinalidade. 

“Rai-ko’ak ne’e la’ós sobu sai tiha kedas maibé rai-ko’ak ne’e kompañia taka de’it mak rai ba ko’ak ne’e. Ne’ebé, ha’u hanoin laiha problema tanba rai-ko’ak feitu hela, só ko’ak ne’e taka de’it ho rai. Ha’u fiar, sira hadi’a hanesan ho nia orijen,” nia hateten.

Bou Lesa infroma, Kompañia COVEC taka rai ba rai-ko’ak ne’e tanba tuir duni dezeñu ne’ebé mak Governu iha tuir programa nasionál nian. Laiha alternativu seluk tanba iha parte sorin ne’e iha mota no rai-naruk kle’an ida entaun alternativu ikus mak hakarak ka lakohi tenke taka duni rai-ko’ak ne’e.

“Maske kompañia taka rai-ko’ak ne’e hala’o tuir Bill of Quantity (BoQ) ne’ebé mak iha maibé loloos sira tenke koordena ho autoirdade munisipál para bele haree no oinsá mak atu proteje rai-ko’ak ne’e. Bainhira udan monu rai mak presiza taka ka proteje buat ruma iha rai-ko’ak nia leten para udan-been labele tama ba ko’ak laran. Ida-ne’e mak ami-na’in rua Sekretáriu Estadu Arte no Kultura, Teofilo Caldas, koa’lia iha ha’u-nia uma iha sábadu ne’e,” nia esplika.

Notísia Relevante: Administradór Postu Administrativu Venilale rejeita COVEC sobu sitiu istóriku “Gua-7”

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here