Xefe Departementu Sentru Matan Nasionál, Belmerio Jerónimo.Imajen/Felicidade Ximenes.

DILI, 15 fevereiru 2021 (TATOLI)—Durante fulan janeiru Sentru Matan Nasionál (SMN) Hospitál Nasionál Guido Valadares (HNGV) halo operasaun ba pasiente na’in 336.

”Pasiente hirak ne’e maioria ho katarak no pterygium ka moras matan uat,’’ Xefe Departementu SMN, Belmeiro Jerónimo ba jornalista Agência Tatoli iha serbisu fatin Bidau, segunda (15/02).

Notísia Relevante:2020, HNGV atende pasiente 22.652

Belmeiro Jerónimo esplika pasiente hirak ne’ebé halo operasaun ba matan katarak maioria ho idade 60 no konsege haree moos.

”Ita simu pasiente la bazeia ba transferénsia, maibé simu no atende kualkér pasiente ne’ebé mai iha ne’e,” nia subliña.

Alende ne’e kada fulan SMN mós iha programa outreach ba Munisípiu ho dadus rejistadu hatudu katak pasiente barak liu mak moras katarak.

Kona-bá kauza prinsipál hosi katarak, Belmeiro Jerónimo dehan mai-hosi kestaun idade, bainhira idade avansadu tenki sofre moras ida-ne’e.

SMN mós kontinua hala’o programa outreach iha munisípiu tanba hetan fundus hosi Organizasaun Mundiál Saúde (OMS) ne’ebé tuir planu sei hala’o iha Munisípiu Liquica iha semana ne’e, maibé tanba surtu COVID-19 nune’e posibilidade sei estende.

Entretantu totál moras matan ne’ebé SMN rejista iha fulan janeiru hamutuk 1.660.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here