Plantasaun multi bebida Heineken iha Hera. Imajen/Heineken

DILI, 15 fevereiru 2021 (TATOLI)–Inspetór Jerál Traballu (IGT, sigla portugés), Rofino Lopes dos Reis, informa, empreza Heineken deside hapara traballadór balun tanba rendimentu kompañia menus.

“Kompañia Heineken hapara traballadór na’in-neen iha perídu Estadu Emerjénsia ho razaun rendimentu menus kompara ho tinan sira liubá,” tenik Responsável ne’e ba Agência TATOLI, iha ninia knaar fatin, Hudi Laran, segunda ne’e.

Bainhira IGT halo enkontru ho Heineken, relata katak iha tinan 2016 prodús bebida litru millaun 8,4, maibé tama tinan 2017 to’o 2020 produsaun tun ba bebeik no daudaun atinje de’it litru millaun 4,8 (korresponde 45%).

Kompañia estrnjeiru ne’e mós dehan katak bainhira situasaun ne’e kontinua nafatin maka iha posibilidade hamenus tan traballadór.

Iha loron 01 dezembru tinan kotuk, jestór no estrutura kompañia Heineken halo reuniaun ho parte IGT atu buka dalan rezolve kestaun ne’e.

“Ha’u fó hatene ba sira, bainhira atu redús ema tenke la’o tuir Lei Traballu artigu 15, ne’ebé mensiona antes atu hapara traballadór balun ho razaun ekonomia  tenke suspende kontratu ka redús oras serbisu. Maibé kuandu opsaun rua ne’e labele uza hotu ona maka bele hapara kontratu,” Inspetór ne’e esplika.

Iha 22 janeiru, kompañia halo enkontru ho traballadór sira no konsege notifika traballadór 18 relasiona ho rendimentu menus.

“Razaun kompañia hasai notifiksaun ne’e ho intensaun atu fó opsaun rua tuir artigu 15 Lei Traballu, maibé iha traballadór neen maka hakarak hapara kontratu, ho kondisaun kompañia nafatin selu kompensasaun,” nia hatutan.

Enkuantu, traballadór 12 seluk simu desizaun kompañia atu suspende kontratu no redús oras serbisu.

“Suspensaun kontratu ne’e tuir Lei Traballu só to’o de’it  fulan-tolu, enkuantu redusaun oras serbisu to’o fulan-rua no kuandu iha fulan-rua nia laran situasaun normál filafali hanesan kompañia hetan rendimentu di’ak maka sei bolu filafali traballadór na’in-12 maibé kuandu situasaun laiha mudansa maka bele to’o faze hakotu kontratu,” nia akresenta.

Situasaun ne’e halo Heineken triste tanba tenke hasai traballadór ne’ebé kompañia investe ona halo formasaun no iha sorin seluk IGT informa ona dadus ba Ministériu Koordenadór Asuntu Ekonómiku (MKAE) hodi relata ba Parlamentu Nasionál.

“Ita espera kompañia ne’e bele ultrapasa kondisaun ne’e, nune’e bele filafali ba situasaun normál atubele fó garantia ba ita-nia maluk traballadór sira,” nia tenik.

Antes ne’e, Deputadu Bankada FRETILIN, Dário Madeira, hato’o nia lamentansaun iha plenária, relasiona ho desizaun Heineken hapara traballadór timor-oan.

Heineken asina akordu investimentu ho Governu Timor-Leste iha janeiru 2015 no akordu ba rai no plantasaun Hera asina iha juñu 2015, maibé produsaun hahú iha janeiru 2017.

Iha Timor-Leste, Heineken hanesan investidór estranjeiru dahuluk ne’ebé maka investe iha setór fabrikasaun ne’ebé oras ne’e daudaun kria empregu direta no indireta ba timor-oan hamutuk 600 resin.

Kompañia estranjeiru ne’e gasta ona millaun $38 hodi harii plantasaun multi bebida ho klase mundiál no sei prodús serveja oin-oin ho marka internasionál hanesan, Bintang, Tiger, ABC,  inklui bebida naun alkól seluk tan.

Heineken nu’udar serveja marka internasionál, ne’ebé eziste ona iha nasaun 170.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here