Sekretariu Estadu Protesaun Sivíl (SEPS), Joaquim José Gusmão dos Reis Martins. Imajen Tatoli/Egas Cristovão

DILI, 15 fevereiru 2021 (TATOLI)-Reprezentante sira hosi Diresaun Nasionál ba Protesaun Sivíl prepara ona sira nia-an ba emerjénsia ruma iha futuru liuhosi atende treinamentu kona-ba Monitorizasaun, Evaluasaun no Aprendizajen (MEAL – sigla Ingles), ho apoiu hosi Parseria Umanitária Australia (AHP – sigla ingles).

Komunikadu imprensa ne’ebé  segunda ne’e Agéncia TATOLI asesu hosi Care Internasionál katak, objetivu hosi treinamentu ida-ne’e atu hasa’e koñesimentu no abilidade partisipante lubuk sira nian iha Monitorizasaun, Evaluasaun no Aprendizajen no ida-ne’e sei tulun sira atu halo planu ba kolesaun dadus no análize, ho prepara relatóriu iha momentu sertu ba desizór sira durante no hafoin emerjénsia.

Iha treinamentu nia rohan, partisipante sira sei familiariza sira nia knar atualizadu bazeia ba Polítika Jestaun Risku Dezastre Timor-Leste nian (DRM – sigla Ingles), espesialmente kona-ba Jestaun Risku Dezastre Bazeia ba Komunidade (CBDRM – sigla Ingles) atu hala’o knar iha preparasaun dezastre, redusaun risku no responde ba emerjénsia iha nivel sub-nasionál nian.

Konsorsiu hosi Parseria Umanitária Australia (konsiste husi CARE, Caritas Australia, Oxfam, World Vision no Plan International no parseiru lokál) fó ona treinamentu loron-tolu ba koordenadór Protesaun Sivíl nian hosi munisípiu 13  iha Timor-Leste nune’e mós ba funsionáriu Protesaun Sivíl/NDRMD nivel nasionál iha sala reuniaun Ministériu Interior nian, hosi loron 10 – 12 fevereiru 2021.

Reprezentante hosi Embaixada Australia, Carli Shillito hateten, monitorizasaun, Evaluasaun no Aprendizajen nu’udar parte importante ida ba serbisu hotu – Maibé importante liu mak jestaun dezastre adapta lalais ba sirkunstánsia nia mudansa.

“Ha’u kontente atu haree katak Protesaun Sivíl no AHP halo prioridade ida-ne’e no implementa treinamentu ne’e”.

Shillito mós hatutan liután katak Australia kontente tebes atu apoiu servisu di’ak sira hosi Sekretaria Estadu Protesaun Sivíl nian ba jere dezastre iha Timor-Leste no treinamentu ida-ne’e nu’udar ezemplu seluk hodi kontinua kolaborasaun ne’ebé besik liután entre AHP no Protesaun Sivíl.

Diretór País nian hosi CARE International iha Timor-Leste no lider ba konsorsiu AHP nian, Peter Goodfellow komenta katak ho lalais, informa ba desizór sira iha emerjénsia, krítiku tebes atu salva vida ema nian no responde ba ema vulneravel sira hosi membru sosiedade nian.

“Ami hein atu ba oin kontinua dezenvolve no apoiu estrutura jestaun dezastre sub-nasionál nian atu tulun hodi asegura katak komunidade sira iha Timor-Leste nia laran tomak preparadu di’ak liután no reziliente hasoru impaktu husi dezastre naturaís no mudansa klimátika,” nia hateten.

Iha nia diskursu enserramentu iha treinamentu nian, Sekretaria Estadu ba Protesaun Sivíl, Joaquim José Gusmão dos Reis Martins, hateten dezenvolvimentu umanu nu’udar save primária atu dezenvolve instituisaun.

Sekretáriu Estadu Protesaun Sivíl apresia kooperasaun amizade hosi ajénsia hotu-hotu nivel nasionál no internasionál espesiál ba ajénsia AHP sira, ne’ebé mak partisipa ativu apoiu dezenvolvimentu kapitál umanu no investe iha area redusaun risku dezastre (RRD).”

Kona-ba projetu Disaster READY nian

Projetu Disaster READY hanesan komponente save ida hosi programa Parseria Umanitária Australia ka Australian Humanitarian Partnerships (AHP), no implementa hosi konsorsiu AHP nian inklui CARE International iha Timor-Leste, Caritas Australia, OXFAM, PLAN no World Vision, Organizasaun Nasional ba Ema ho Defisiénsia Ra’es Hadomi Timor Oan (RHTO ) hamutuk ho sira nia parseiru lokál sira.

Disaster READY projetu ida ho durasaun tinan haat ho balun (2018 – 2022) servisu liuhosi akordu ka MoU ida ho Sekretáriu Estadu Protesaun Sivíl, Ministériu Interior no koordenasaun besik liu ho Diresaun Nasional ba Jestaun Risku Dezastre (NDRMD – sigla Ingles) hodi harii inkluzividade no aproximasaun sustentável ba preparasaun dezastre no responde dezastre hosi komunidade ba nivel nasionál.

Objetivu jerál husi Disaster READY mak atu hametin kapasidade umanitária lokál nian no preparasaun iha Pasífiku no Timor-Leste atu nune’e komunidade prepara di’ak liután no bele responde ba dezastre no rekoopera hosi dezastre ne’ebé mosu neineik no mosu lalais.

Programa save sira mak foku ba preparasaun dezastre, reforsa koñesimentu no abilidade, hasa’e liután redusaun risku dezastre, reforsa sistema atensaun sedu no hametin liután koordenasaun no parseria ho foku espesiál ba igualdade jéneru no disabilidade no reforsa protesaun labarik liuhosi envolvimentu Governu lokál, sosiedade sivíl no lider relijiozu sira.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here