Inspetór Jerál Traballu, Rofino Lopes dos Reis. Imajen TATOLI/Antónia Gusmão

DILI, 15 fevereiru 2021 (TATOLI)—Inspesaun Jerál ba Traballu (IGT, sigla portugés) rejista kompañia balun komete infrasaun liga ho direitu traballadór durante implementasaun Estadu Emerjénsia (EE) tinan 2021.

“Durante Estadu Emerjénsia tinan ne’e, ami halo ona atividade inspesaun no husi atividade ne’e ami deteta kompañia hamutuk 14 maka komete infrasaun,” Inspetór Jerál Traballu, Rofino Lopes dos Reis, informa ba Agência TATOLI, iha ninia knaar fatin, Hudi laran, segunda ne’e.

Kompañia sira ne’ebé maka komete infrasaun, 12 husi kompañia internasionál no rua husi nasionál.

“Dadus sira ne’e hahú husi implementasaun EE janeiru to’o 15 fevereiru. Ami deteta kondisaun serbisu, seguransa ba protesaun serbisu traballadór laiha inklui osan over time. Ida-ne’e ami hetan durante ami-nia inspesaun no bainhira kompañia sira ne’e viola infrasaun, ami rejista hanesan infrasaun ida,” Inspetór ne’e esplika.

Nia haktuir, iha Xina sira-nia loja balun agora semi fábrika kalen ne’ebé lori husi Xina maka mai prodús iha Timor-Leste, maibé dala ruma kolega sira ne’ebé maka serbisu iha ne’ebá la uza ekipamentu, nune’e maka part IGT konsidera hanesan infrasaun.

“Infrasaun ne’ebé ita detekta ne’e liuhosi atividade inspesaun no totál multa ne’ebé ita aplika ba infratór no ita hatama ba kofre Estadu hamutuk $3.290,” nia hatutan.

Multa mínimu infrasaun mak $230 no boot liu depende haree ba kuantidade ema, kuandu  kompañia la fasilita traballadór uza ekipamentu, nia multa sei boot liu.

Durante halo inspesaun, IGT hamutuk ho Sindikatu Traballadór hodi kompañia sira bele rezolve problema traballadór.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here