Diretor CIGC, Brigadeiru-Jenerál, João Miranda 'Aluk Descartes' . Imajen TATOLI/Egas Cristovão

DILI, 15 fevereiru 2021 (TATOLI)—Diretór Sentru Integradu Jestaun Krize (CIGC, sigla portugés), Brigadeiru Jenerál, João Miranda ‘Aluk Descartes’ hamutuk ho Koordenadór Estadu Maiór Capitão-de-mar-e-guerra Donaciano da Costa Gomes ‘Pedro Klamar Fuik’, hasoru malu ho Primeiru-Ministru, Taur Matan Ruak, hodi ko’alia kona-ba preparasaun destakamentu forsa unidade territoriál.

“Ami ko’alia ho Primeiru-Ministru mak atu aselera prosesu destakamentu unidade territoriál atu fó apoiu postu tátiku ho autoridade munisipál hodi bele asegura ema tama-sai ilegál sira liuhosi fronteira,” Diretór CIGC informa iha Palásiu Governu, segunda ne’e.

Forsa unidade territoriál ne’ebé atu destaka, ninia misaun mak fó apoiu autoridade munisipál no halo sosializasaun kona-ba nesesidade implementasaun.

Unidade territoriál kompostu husi FALINTIL-Forsa Defeza Timor-Leste (F-FDTL) no Polísia Nasional Timor-Leste (PNTL) hamutuk batallaun ida hodi reforsa seguransa iha liña fronteira terrestre no tasi .

Forsa batallaun sei hala’o misaun asegura implementasaun Estadu Emerjénsia  iha liña fronteira munisípiu Bobonaro, Covalima no Rejiaun Administrativa Espesiál Oé-cusse Ambeno (RAEOA).

Antes ne’e, Ekipa konjunta halo ona identifikasaun zona ilegál inklui observa postu Unidade Patrullamentu Fronteira (UPF) no identifika fatin hodi koloka forsa unidade territoriál no fatin kuarentena.

Aleinde ne’e, iha enkontru ne’e, ekipa CIGC atualiza situasaun ba prevensaun COVID-19.

“Ami rekomenda no fó hanoin bebeik ba Primeiru-Ministru katak iha nesesidade atu asegura fronteira sira atu evita ema sira ne’ebé mak iha tendénsia tama ilegalmente, maibé sempre iha ema ida ka rua seidauk iha konsiénsia no sempre tama ilegál,” Brigadeiru Aluk akresenta.

Tuir Brigadeiru, instituisaun Estadu hotu iha obrigasaun atu halo sosializasaun intensiva kona-ba nesesidade aplikasaun medida Estadu Emerjénsia, nune’e bele evita transmisaun lokál COVID-19.

Enkuantu, tuir relatóriu husi Ministériu Saúde iha domingu (14/02), fó sai katak sidadaun timor-oan ida tan mak pozitivu COVID-19, ne’ebé pasiente ne’e iha loron 05 fevereiru 2021 sai husi Timór bá Atambua (Indonézia) ho ilegalmente hodi asiste família mate iha Atambua durante loron lima no ikus mai tama hikas mai Timór ho dalan ilegál.

Ho nune’e, kazu pozitivu ne’ebé agora daudaun iha sala izolamentu hamutuk ema na’in-40.

Jornalista: Antónia Gusmão

Editora: Julia Chatarina  

HAKEREK NO HATÁN

Please enter your comment!
Please enter your name here