Koordenadora Jerál Komisaun Nasionál Prevensaun COVID-19, Odete da Silva Viegas. Imajen Tatoli/Felicidade Ximenes.

DILI, 13 fevereiru 2021 (TATOLI)—Koordenadora Jerál Komisaun COVID-19 Minsitériu Saúde, Odete da Silva Viegas, klarifika sidadaun estranjeiru feto ida-ne’ebé mak tama ilegál hosi fronteira Batugade iha 28 janeiru 2021 ho ojek mai iha familia Beto ne’e, laloos tanba pasiente rasik fó informasaun laloos ba ekipa vijilánsia.

Notísia Relevante: MS deteta tan timor-oan ida pozitivu COVID-19

”Rumór ne’ebé mak espalla iha mídia sosiál kona-ba sidadaun estranjeiru feto ida, idade 34, ho kazu pozitivu COVID-19 iha loron 08 fevereiru 2021 ne’e la loos. Sidadaun estranjeiru ne’e tama ilegál hosi fronteira Batugade iha 28 janeiru 2021 tama iha Dili ho ojek maibé sidadaun ne’e la hato’o informasaun loloos ba iha servisu vijilánsia, finalmente pasiente ne’e mai ho ojek hosi Batugade mai liu iha nia uma iha Kuluhun,’’ Odete da Silva Viegas hateten ba jornalista sira bainhira halo konferénsia imprensa iha MS, Caicoli, Dili, sábadu ne’e.

Nia dehan, pasiente ne’e to’o iha Kuluhun hasoru malu ho nia kaben depois sira na’in-rua aluga taxi ba fali Beto mak família kontaktu ba ekipa vijilansia hodi lori nia ba hatama kuarentena Tibar mak hafoin halo teste Swab ne’e hatudu rezultadu pozitivu.

”Istoria pasiente ne’e kontaktu besik ho nia kaben no mós nia oan na’in-tolu no nia kaben. Horisekik ekipa vijilánsia no ekipa Sentru Integradu Jestaun Krize foti ba halo kuatrentena iha Hotel Novo Horizonte Metiaut no hodi kalan hasai kedas swab no ninia rezultadu negativu. Entaun, família ne’e agora halo kuarentena obrigatóriu iha Hotel Novo Horizonte no ita hein to’o loron 14, molok sira atu sai, ita sei halo teste swab dala ida tán ba sira,’’ nia hateten.

Tanba ne’e, nia husu ba públiku labele paniku maibé mantein nafatin medida sira-ne’ebé mak iha, tanba ba aman ho oan na’in-tolu ne’e ekipa laboratóriu hasai ona swab maibé rezultadu negativu.

Entretantu, nia hato’o ba públiku katak iha mós sidadaun timoroan mane na’in-ida ne’ebé mak tama ilegál iha loron 11 fevereiru, idade 36, nia viajen hosi Surabaya iha 09 fevereiru liuhosi Kupaun no iha 10 fevereiru ne’e tama liuhosi Batugade ho bus Maliana nian mai kedas Tasi Tolu-Dili, no nia família sira tula liu ba Turiskai-Same.

Nia haktuir, too iha Turiskai-Same mak nia entrega aan ba polísia mak polísia lori nia ba iha Sentru Saúde Turiskai. Iha sentru ne’e, nia dehan, ema-ne’e informa ba Diretora Servisu Saúde Munisípiu Manufahi no horisehik Ekipa Vijilánsia Sentru Integradu Jestaun Krize iha Dili ba direta foti sidadaun na’in-rua ne’e hodi kumpre kuarentena iha Hotel Novo Horizonte no halo ona teste swab maibé rezultadu negativu. 

“Tanba ne’e,  bolu atensaun ba sidadaun sira iha Dili laran no área fronteira katak ita-nia sidadaun sira-ne’ebé mak hetan pozitivu sai hosi ita-nia rain ba nasaun viziñu no sira tama fila kedas mai signifika katak ita hatene hela ameasa iha ita-nia rain, maibé ita rasik mós kontribui ona ba moras ne’e atu hada’et ba ita-nia komunidade sira. Ida-ne’e ameasa boot ida no responsabilidade la’ós ona Ministériu Saúde, Ministériu Defeza no  Ministériu Interior nian. Maibé, responsabilidade iha komunidade sira hotu tanba ita fó ona riksu transmisaun momentu atu akontese iha ita-nia rain,’’ nia esplika.

Jornalista: Felicidade Ximenes

Editór: Cancio Ximenes

HAKEREK NO HATÁN

Please enter your comment!
Please enter your name here