Reprezentante OMS iha Timor-Leste, Arvind Mathur. Imajen Tatoli/Maria Auxiliadora.

DILI, 13 fevereiru 2021 (TATOLI)—Organizasaun Mundiál Saúde (OMS) oferese ona apoiu tékniku liuliu oras ne’e daudaun hanorin hela profisionál saúde sira iha Timor-Leste (TL) kona-bá mekanizmu vasinasaun COVID-19 tuir rekomendasaun ne’ebé iha.

“Oras ne’e daudaun OMS hamutuk ho Ministériu Saúde fó hela treinamentu ba médiku hosi munisípiu 12 inklui Rejiaun Administrativa Espesiál Oe-cusse Ambeno (RAEOA), hodi prepara ba imunizasasaun bainhira ai-moruk ne’ebé Governu sosa to’o-mai,” Representante OMS iha Timor-Leste, Arvind Mathur hateten ba jornalista Agência Tatoli iha serbisu fatin Caicoli, sesta (12/02).

Notísia Relevante:OMS rekomenda Governu hili AstraZeneca

Tuir planu, segunda semana-oin sei iha mós treinamentu ba Diretór Serbisu Saúde Munisipál-sira kona-bá oinsá halo mobilizasaun ba vasina ne’e.

Alende ne’e, OMS sei serbisu hamutuk ho MS atu estabelese ekipa iha kada munisípiu inklui organiza oinsá halo sosializasaun ne’ebé efetivu liuhosi meiu komunikasaun sira.

“Ita sei forma ekipa ba iha Munisípiu ida-idak atu halo imunizasaun ho di’ak no seguru, inklui sei halo orientasaun ba jornalista-sira kona-bá kobertura ba vasinasaun ne’e,” nia subliña.

Ikus-liu OMS hakarak apela ba ema hotu liuliu jornalista-sira atu fó sai informasaun ba públiku katak vasinasaun AstraZeneca ne’e seguru no di’ak.

Notísia Relevante:MS deteta tan timor-oan ida pozitivu COVID-19  

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here