Imlek 2021. Imajen/bola.com

DILI, 12 fevereiru 2021 (TATOLI)—Prezidente Asosiasaun Komersiante Komunidade Xineza iha Timor-Leste, Kathleen Gonçalves, informa tinan ne’e komunidade xineza la komemora tinan foun xina (Imlek) tanba situasaun pandemia COVID-19.

“Seremónia tinan foun xina nian ami sempre komemora, maibé tinan ne’e ami kansela hotu,” Prezidente Asosiasaun dehan ba Agência TATOLI, via telefónika, sesta ne’e.

Tuir Kathleen, komunidade xineza iha Timor-Leste hakarak kumpre medida Estadu Emerjénsia ne’ebé mensiona labele halibur ema barak iha fatin ida.

Enkuantu, komemorasaun tinan foun xina ba tinan ne’e koñesidu ho tinan karau.

“Tinan ne’e nu’udár tinan karau nian. Animál karau hanesan ita hotu koñese, animál ida ne’ebé forsa tebes. Ho nune’e  ami fiar metin katak tinan ne’e sei dudu sai buat ne’ebé ladi’ak no sei dudu sai sasán ne’ebé ladi’ak. Selebrasaun tinan foun bele lori buat ne’ebé di’ak mai ita-nia moris,” nia akresenta.

Iha biban ne’e, Prezidente Asosiasaun husu komersiante komunidade xineza atu pasiénsia ba tinan ne’e hodi kontinua luta ba COVID-19, ne’ebé afeta tebes ba rendimentu negósiu no espera bele moris ho normál.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here