Ministra Negósiu Estranjeiru no Kooperasaun (MNEK),Adaljiza Albertina Xavier Reis Magno. Imajen TATOLI/Evaristo Soares Martins.

DILI, 12 fevereiru 2021 (TATOLI)–Prezidente Parlamentu Nasionál (PPN), Deputadu Aniceto Longuinhos Guterres Lopes, konvida Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno hodi diskute kooperasaun internasionál ne’ebé durante ne’e parlamentu halo ona.

“Ohin, ha’u mai hetan konvite hosi Prezidente Parlamentu Nasionál, mai ko’alia kona-ba kooperasaun internasionál ne’ebé Parlamentu Nasionál halo no depois husu para MNEK bele fasilita kooeprasaun Parlamentu Nasionál nian nasaun sira seluk no espesialmente Uniaun Europeia tanba sira iha programa barak,” Ministra Adaljiza Albertina Xavier Reis Magno, informa ba jornalista sira, iha PN, sesta ne’e.

Governante ne’e haktuir, PPN husu ba MNEK atu kanaliza programa sira-ne’ebé parlamentu halo ho nasaun amigu sira.

“Konkretu liu mak programa dijitalizasaun parlamentu nian depois programa fortalesimentu institusionál,” Xefe Diplomata ne’e informa.

Tuir nia, Prezidente Parlamentu Nasionál hakarak haforsa no hametin liután dezenvolvimentu instituisaun parlamentu nian, liuliu formasaun ba funsionáriu tékniku sira hosi Parlamentu Nasionál.

“Ezemplu ba kursu iha rai-li’ur, liuhosi MNEK bele kanaliza ba nasaun amigu sira,” nia dehan.

Prezidente Parlamentu Nasionál komnvida MNEK hafoin hasoru ho embaixadór Nova Zelándia, Embaixadora Malázia no Embaixadór Japaun.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here