Ministru Petróleu no Minerál, Víctor da Conceição Soares no Presidente CCI-TL, Oscar Lima, asina nota entendimentu, iha salaun MPM, tersa (12/02). Imajen TATOLI/Egas Cristovão

DILI, 12 fevereiru 2021 (TATOLI)—Ministériu Petróleu no Minerál hamutuk ho Kámara Komérsiu no Indústria Timor-Leste (CCI-TL) asina nota entendimentu atu CCI-TL apoiu edifísiu rua iha Acait, ba funsionáriu no tékniku espesiál ministériu nian.

Entendimentu ne’e asina husi Ministru Petróleu no Minerál, Víctor da Conceição Soares ho Prezidente CCI-TL, Oscar Lima.

“Ita asina nota entendimentu ne’e atu fó espasu tuir nesesdiade ne’ebé iha, tanba espasu iha ne’e la sufisiente ba funsionáriu no tékniku ministériu. Nune’e CCI-TL fó espasu iha Acait atu utiliza, nune’e bele fó biban ba ministériu sira hala’o serbisu di’ak liután,” Ministru Víctor informa, sesta ne’e, hafoin asina akordu iha salaun enkontru iha MPM, Bebora.

Ministru Petróleu no Minerál, Víctor da Conceição Soares. Imajen TATOLI/Egas Cristovão

Tuir governante, mudansa estruturál ne’ebé halo liuliu aumenta pesoál tékniku no espesialista sira halo espasu la sufisiente ona atu hala’o serbisu.

Nune’e, nia agardese ba Kámara Komérsiu tanba fasilita ona espasu balun hodi hatudu motivasaun no intensaun vontade Governu  atubele hala’o knaar ho di’ak.

Akordu ne’e, atubele fó tulun iha períodu tranzisaun tanba daudaun ministériu hahú halo diskusaun ho Sekretáriu Estadu Terra Propriedade (SETP) atu liberta rai ektare rua resin iha aeroportu tuan, Palásiu Prezidensiál nia kotuk atu konstrui edifísiu MPM.

Ministru Petróleu no Minerál, Víctor da Conceição Soares no Presidente CCI-TL, Oscar Lima, asina nota entendimentu, iha salaun MPM, tersa (12/02). Imajen TATOLI/Egas Cristovão

Iha tinan ne’e, MPM prevee ona orsamentu $700.000 ba libertasaun rai no halo planu dezeñu atu konstrui edifísiu ne’ebé modernu no sufistikadu ba ministériu ho ninia ajénsia outónomu sira hanesan Autoridade Nasionál Petróleu no Minerál (ANPM), Timor Gás no Petróleu, Empreza Públika (Timor Gap, EP) no Institutu Petróleu no Jeolojia, (IPG, sigla portugés) inklui empreza mineiru ne’ebé sei kria tan.

Totál orsamentu seidauk inklui konstrusaun tanba finaliza dezeñu mak fazeadamentu aloka fali ba orsamentu kada tinan hodi hahú konstrusaun.

Iha biban hanesan Prezidente CCI-TL, Oscar Lima, hateten inisiativa entrega edifísiu ne’e atu bele fó espasu ba tékniku MPM atu halo serbisu ho di’ak.

Presidente CCI-TL, Oscar Lima. Imajen TATOLI/Egas Cristovão

“Ami hakarak iha kooperasaun di’ak ho ministériu ida ne’e no ami fó ami-nia apoiu atu minisitériu ne’e bele hala’o nia knaar di’ak liután,” nia dehan.

Edifísiu iha Acait, aleinde oferese ba MPM, ates ne’e Sekretáriu Estadu Kooperativa (SEKoop) no Sekretáriu Estadu Ambiente (SEA) okupa ona.

“Ita hatene katak ministériu ida-ne’e (MPM) mak hatama osan maka’as liu ba ita-nia konfre Estadu, tanba setór privadu ne’e sei fraku no seidauk iha indústria barak atu halo atividade hodi bele hetan osan,” nia akresenta.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here