Membru Conselho de Imprensa de Timor-Leste (CI) periódu daruak tinan 2021-2025, hala’o enkontru dahuluk. Imajen/Espesiál.

DILI, 12 fevereiru 2021 (TATOLI)—Prezidente Conselho de Imprensa (CI), Virgílio da Silva Guterres, hateten ba oin CI sei halo parseria ho Asosiasaun Jornalista Timor-Leste (AJTL), Timor-Leste Press union (TLPU) no mídia-na’in sira atu promove no kapasita jornalista sira.

Notísia Relevante: Mandatu daruak, CI sei aplika sansaun ba órgaun KS sira

“Atu kapasita no promove jornalista mak hodi hadi’a no hasa’e kualidade teknika, atu nune’e sira bele kumpre loloos étika ne’ebé aplika iha komunikasaun sosiál nian,” Virgílio da Silva Guterres ba Agência TATOLI iha salun Conselho de Imprensa, Quintál-Boot, Dili, sesta ne’e.

Nia dehan, CI ninia responsabilidade ida mak apoia asosiasaun jornalista sira atu kapasita jornalista sira maibé dezafiu ida-ne’ebé sira enfrenta ne’e mak CI labele halo transferénsia públika ba asosiasaun sira ne’e.

Maibé, nia hateten, buat ne’ebé CI halo ne’e mak halo kooperasaun no organiza hamutuk eventu formasaun, lansamentu ba prémiu jornalizmu ninian, atu insentiva jornalista sira bele hadi’a sira-nia performa.

Nune’e mós, tuir nia, bele fasilita jornalista sira ba rai-li’ur tuir formasaun ruma maibé tanba COVID-19 labele ba li’ur, entaun agora CI nia dezafiu ne’e mak meiu oinsá mak bele fó formasaun ba jornalista sira liuhosi virtual meeting,” nia dehan.

Iha parte seluk, nia hateten, Conselho de Imprensa nia planu ida tan mak atu konsiensializa autoridade seguransa, defeza, governante no komunidade sira kona-ba literásia mídia nian.

“Kona-ba literásia mídia, CI nia planu iha intervensaun barak no halo kooperasaun ho instituisaun ka parseiru sira, halo sensibilizasaun ba autoridade lokál sira kona-ba lei komunikasaun sosiál nian no mós fó hatene ba sira kona-ba direitu resposta no ratifikasaun oinsá sira bele uza plataforma mídia ne’ebé iha atu hato’o sira-nia hanoin,” Virgílio haktuir.

Nia informa, iha tinan kotuk CI halo kooperasaun ho Universidade Orientál de Timor Lorosa’e (UNITAL), Polísia Nasionál Timor-Leste (PNTL), UNDP, UNESCO, Uniaun Europeia (UE), no sira kontinua fasilita formasaun ba jornalista sira no mós ba públiku kona-ba ema-nia kuñesimentu kona-ba imprensa.

Notísia Relevante: AJTL-TLPU Presiza Fó Formasaun Espesífika No Avansada Ba Jornalista

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here