Dezeñu osan tahan ne’ebé espalla iha públiku. Imajen/Espesiál

DILI, 12 fevereiru 2021 (TATOLI)–Governadór Banku Sentral Timor-Leste (BCTL, sigla portugés), Abraão Vasconselos, laiha koñesimentu relasiona ho imajen ne’ebé espalla iha públiku liuhosi rede sosiál kona-ba osan tahan ho montante $100 ne’ebé uza fotografia líder nasionál, Kay rala Xanana Gusmão.

“Atu hateten BCTL laiha koñesimentu ba ida-ne’e. Ha’u mós haree ona imajen ne’e maibé la’ós husi BCTL,” Governador BCTL ne’e dehan ba Agência TATOLI via rede sosiál, sesta ne’e.

Tuir Governadór, daudaun ne’e Banku Sentrál seidauk iha planu atu dezeña moeda no osan tahan Timor-Leste nian.

“Ema ida halo ne’e kreativu duni, ha’u gosta nia dezeñu. BCTL seidauk simu keixa ruma maibé imajen ida-ne’e la’ós buat sériu ida hodi públiku tenke preokupa. Laiha parte balun husi imajen ida-ne’e mak hanesan ho ita-nia moeda ofisiál agora, ne’ebé laiha problema,” nia akresenta.

Biban ne’e, Governadór apela ba públiku katak lalika preokupa ho imajen ida-ne’e tanba Timor-Leste daudaun seidauk iha planu atu introdús osan ofisiál rasik.

“Ita kontinua uza dollar Amerikanu nu’udár ita-nia moeda ofisiál, maibé kuandu iha ema ruma mak tenta halo tranzasaun ho notas modelu hanesan ne’e halo favór informa ba autoridade Polisiál ne’ebé besik,” Dirijente másimu Banku Sentrál apela.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here