Komunidade sira okupa rai Estadu iha area protejida Mata ninin Comoro nian. Imajen/Mídia MOP

DILI, 11 fevereiru 2021 (TATOLI)- Sekretária Estadu Terras no Propriedade (SETP) apela ba Timoroan hotu ne’ebé utiliza rai ho títulu Estadu atu labele fa’an ka fó kontratu  arrendamentu  tutan ba ema seluk.

Sekretáriu Estadu Terras no Propriedade, Mario Ximenes, informa iha kazu balun SEPT  identifika iha abitante  balun utiliza rai Estadu halo tiha kontratu arrendamentu no  halo sub-arrenda tutan ho Xinés balun hodi loke loza.

Notísia Relevante : SETP sei estabelese komisaun terras rezolve disputa rai

Nia esplika, ida ne’e lei fó dalan bele halo sub-arrenda, maibé presu ne’ebé antes ne’e Governu aplika ba arrendatáriu primeiru define ona  nia hakarak  atu halo sub-arrenda presu labele  hasae liu.

Sekretáriu Estadu Terras no Propriedades (SETP),
Mário Ximenes. Imajen Tatoli/ António Goncalves.

“Iha Timoroan ida nia utiliza rai Estadu halo kontratu arrendamentu rai ho Estadu no Estadu aplika presu selu kada fulan $200.00, maibé nia halo sub-arrenda tutan ho ema seluk labele selu ba nia  liu  fila-fali $200.00. Ne’e la bele,’’ Sekretáriu Estadu Mario Ximenes hateten hodi responde Agência TATOLI iha nia kna’ar fatin, Colmera, Dili, Kuarta (10/02).

Nia hatutan, irregularidade sira ne’e SEPT rejista no halo kedas intervensaun hodi hapara kontratu inisiál no kontinua aplika kontratu ba (segundu pesoa) nune’e bele selu arrendamentu direita ba Estadu.

Mario Ximenes, dehan irregularidade sira ne’e depende ba ninia pezu, se kuandu iha prezuiju boot ba Estadu, maka SETP sei  haruka direita ba Tribunál hodi bele loke prosesu tuir dalan legál.

Sekretáriu Estadu Mario Ximenes, la esplika detallu kona-ba durante ne’e rejistu númeru prosesu kazu hira ba prosesu ne’e, maibé nia fó hanoin katak iha númeru ladún barak ne’ebé akontese hanesan iha Comoro, area Tasi Tolu ho sira seluk tan.

SETP sei estabelese Komisaun Terras  nune’e bele rezolve di’ak liu tan  preokupasaun hirak ne’e liu-liu haree ba iha legalidade sira.

SETP mós servisu hamutuk ho Ministériu Administrasaun Estatál (MAE), Sekretária Estadu Protesaun Sivíl  kontinua fó informasaun ba komunidade sira ne’ebé utiliza rai Estadu ka rai domíniu públiku Estadu atu ba rejistu iha terras propriedade hodi nune’e Estadu bele regulariza.

Jornalista   : Nelson de Sousa

Editór        : Francisco Simões

1 KOMENTÁRIU

  1. Hau hanoin ide nee mos los,tamba fo aluga tutan ba ema seluk kuandu iha loron ikus estadu hakarak atu foti fila fali rai nee nia ganti rugi ulun moras,diak liu husu ba guvernu atu halo inventarija ba nia propiedade rasik nebe maka iha tia ona,no husu ba okupante sira karik sira hakarak halo aumenta tan uma ou fatin tengki hatoo ba guvernu maka hanesan nain ba propriedade nee,nune governo sei halo deklarasaun ho okupante katak propiedade nebe maka aumenta sei laiha konpensasaun husi guvernu karik iha loron ikus governu hakarak foti fila,ida nee maka hau nia sujestaun ba guvernu atu labele kria probleba entre guvernu ho komunidade…..

HAKEREK NO HATÁN

Please enter your comment!
Please enter your name here