Mapa Munisípiu Liquiçá (Google)

DILI, 11 fevereiru 2021 (TATOLI)—Eskola Ensinu Sekundáriu Jerál (ESJ) Paralela iha suku Fatumasi Postu Administrativu Bazartete, Munisípiu Liquiçá reativa prosesu aprendizazen iha sábadu loron 6 fevereiru tinan ne’e, tanba atividade eskolár paradu durante tinan hitu (2013-2020).

Diretór Serbisu Edukasaun Munisipál Liquiçá, Zito António de Oliveira da Costa, informa Ministru Edukasaun Juventude no Desportu (MEJD), Armindo Maia mak halo abertura ba prosesu aprendizazen tanba hetan konvite hosi parte Serbisu Edukasaun Munisipál no inan-aman estudante sira-nian.

“Ministru mai iha-ne’e hodi reativa fila-fali eskola Paralela ne’ebé taka tiha iha 2013,” Zito António hateten ba jornalista Tatoli via telefónika, kinta (11/02).

Zito António klarifika katak ho prezensa MEJD nian atu enkoraza autoridade sira iha Postu Administrativu ne’e ho inan-aman estudante sira-nian, hodi kontribui ba prosesu aprendizazen iha eskola ne’e liuliu ajuda profesór voluntáriu sira tanba tinan 2021 Ministériu la prevee orsamentu ba eskola ne’e rasik.

“MEJD entrega ba komunidade atu apoia ninia sustentabilidade administrasaun tanba iha 2021 la prevee orsamentu,” diretór ne’e sita lia-fuan hosi MEJD, Armindo Maia.

Kona-bá mekanizmu kontribuisaun hosi inan-aman, nia dehan sei konvoka reuniaun iha semana ne’e atu bele hetan konkordánsia ruma.

Nia konta tuir katak, eskola ne’e harii iha 2011 no eis Diretór Serbisu Edukasaun Munisipál Liquiçá muda-tiha mai iha suku Bogoro parte tasi-ibun Liquiça-Vila nune’e prosesu aprendizazen paradu iha 2013.

“Entaun difikulta fali suku sira iha parte foho labele asesu tanba distánsia dook ho kilómetru 20,” Zito António salienta.

Entretantu objetivu hosi harii ESJ Fatumasi ne’ebé Paralela ba Eskola Ensinu Sekundária Jerál númeru 1 Hu Iso Lara Iso Liquiçá-Vila, hodi fó resposta ba komunidade ne’ebé dook hosi Vila atu labele la’o dook ba eskola iha Dili, Rai-Laku no Liquiçá-Vila rasik.

Desde hahú iha 2011, nia dehan, iha grupu ida mak konsege remata estudu ho totál alunu 70-resin, dala ida de’it muda-kedan ESJ Paralela ne’e ba suku Bogoro.

“Agora muda no reativa fali iha fali fatin anteriór, maibé prosesu aprendizazen iha ESJ Paralela ida iha Suku Bogoro mós kontinua la’o nafatin, tanba bele simu alunu sira hosi Tibar, Kasait, no Ai-pelu,” nia subliña tan.

Rejistu foun ba tinan 2021, ESJ Paralela Fatumasi hetan alunu na’in 120 ne’ebé ninia prosesu aprendizazen uza sala-de-aula haat hosi edifísiu unidade rua ne’ebé iha iha parte lorokraik.

Edifísiu unidade rua ne’e nia dehan, ida ho sala-de-aula sia ne’ebé estudante sira hosi Ensinu Báziku Terseiru Síklu mak utiliza, no ida seluk ho sala-de-aula ualu utiliza hosi  estudante Primeiru no Segundu Síklu.

Kona-bá edifisiu, meza no kadeira laiha problema tanba hetan apoiu hosi Governu Japonés liuhosi ninia Embaixada iha Díli desde tinan 2011.

Oras ne’e daudaun ESJ Paralela Fatumasi iha profesór na’in-neen, kompostu hosi  permanente na’in-rua no voluntáriu na’in-haat.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here