Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timor. Imajen Tatoli/Eugénio Pereira

DILI, 11 fevereiru 2021 (TATOLI)- Komandu FALINTIL-Forsa Defeza Timor-Leste (F-FDTL) hamutuk ho reprezentante liña ministériu sira, kinta ne’e, kontinua hala’o enkontru koordenasaun hodi diskute regulamentu interna haat ne’ebé sei implementa iha Autoridade Marítima Nasionál (AMN) Timor-Leste.

Regulamentu haat ne’e hanesan, regulamentu ba Komisaun Asuntu Mar (CAM), regulamentu Diresaun Autoridade Marítima (DAM), regulamentu Kapitál no regulamentu ba Atividade Unidade Marítima no Forsa Jurisdisaun.

Notísia Relevante : Implementasaun AMN sei iha faze konsultasaun

Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timor, husu ba ekipa tékniku liña ministeriál presiza ativu atu hato’o ideia matenek sira hodi ekipa bele elabora ninia rekizitu ho di’ak molok implementa.

“Reuniaun ida ne’e importante para sira bele diskute asuntu balun liga ho regulamentu sira ne’ebé sei regula no implementa iha AMN,” Lere hateten ba jornalista iha Komandu Jerál F-FDTL, Fatuhada, Dili.

Lere dehan, regulamentu haat ne’ebé ekipa sira diskute importante tebes hodi sai giaun ka mata-dalan ba AMN nia servisu ba futuru. Tanba liña ministériu no instituisaun Estadu  20-resin hola parte iha AMN.

Komandante Lere mós husu ba Governu atu kria kondisaun prepara harii infraestrutura báziku ba Navál nian inklui edifísiu no ekipamentu servisu AMN nian ne’ebé tuir planu sei harii iha Portu Navál Here-Dili.

Komandante Lere dehan, bainhira ekipa sira diskute regulamentu no rekizitu  servisu sira seluk remata ona, kada liña ministériu no instituisaun autónoma sira sei propoin sira-nia funsionáriu na’in-rua hodi hola parte iha AMN no prepara fó pose ba estrutura sira.

Iha fatin hanesan, Kapitaun-de-Mar-e-Guerra, Higino da Neves, informa sira kontinua konvida ekipa liña ministeriál sira hodi partisipa para bele fó ideia ba kriasaun regulamentu sira ne’ebé sei estabelese iha AMN.

Nia dehan, regulamentu ne’ebé ekipa konjunta elabora hotu ona, kompostu hosi Regulamentu ba Komisaun Asuntu Mar (CAM) hodi entrega ona ba Ministru Defeza atu aprezenta ba Konsellu Ministru.

Ekipa sei kontinua diskute regulamentu Diresaun Autoridade Marítima (DAM), Regulamentu Kapitais no Regulamentu ba Atividade Unidade Marítima no Forsa Jurisdisaun (SAM).

Tuir planu regulamentu hirak ne’e ekipa sei diskute no termina iha abríl 2021 sei konklui servisu no prepara serimónia pose ba grupu traballu sira.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here