Osan Dolar Amerikanu. Imajen/Espesiál

DILI, 11 fevereiru 2021 (TATOLI)Ofisiál Unidade Planeamentu, Monitorizasaun no Avaliasaun (UPMA), Dionísio dos Santos, hateten desizaun Ministériu Finansa (MF) hasai sirkulár atu ko’a orsamentu kada ministériu 7% husi totál orsamentu hodi finansia programa Cesta Bázika, la’ós automátikamente maibé depende ba pedidu pagamentu.

“Bele hasai orsamentu 7% maibé la’ós automátika hasai maibé bazeia ba pagamentu ne’ebé iha, nune’e labele afeta maka’as ba meta ministériu ninian. Tanba ne’e, desizaun ministériu sira hasai to’o 7% la’ós tenke hasai hotu maibé tuir nesesidade bele 1% ou 2% no tenke asegura meta sira,” Ofisiál UPMA hateten ba Agência TATOLI, iha ninia knaar fatin, Palásiu Governu, kinta ne’e.

Notísia relevante: Orsamentu la tranzita, ko’a 7% kada ministériu apoiu Cesta Bázika

Dionísio dos Santos rekoñese bainhira ko’a osan ministériu sei afeta ba meta tanba orsamentu tinan ne’e bazeia ba programa.

“Haree husi lójika de’it automátikamente afeta ba sira-nia meta, tanba ne’e ministériu ida-idak tenke analiza ninia efeitu ba sira-nia meta tanba orsamentu bazeia ba programa ne’e foku ba rezultadu uluk mak ko’alia osan,” nia esplika.

Tuir Ofisiál UPMA, presiza iha gastu tuir nesesidade hdi bele atinje rezultadu.

“Ha’u fó ezemplu de’it hanesan Sekretaria Estadu Igualdade no Inkluzaun kuandu sira halo planeamentu, aloka osan ba atividade ho meta, hafoin implementasaun afinál parseiru dezenvolvimentu balun interese no hakarak finansia atividade ne’e, ne’ebé Sekretaria Estadu la presiza gasta ninian osan, ida-ne’e bele akontese,” nia argumenta.

Sorin seluk, nia dehan, atu atinje meta importante sira, Governu bele halo orsamentu retifikatifu.

“Ita la hatene iha tinan klaran fulan-juñu no jullu, karik Governu hanoin halo orsamentu retifikativu, ne’ebé la’ós atu aumenta osan maibé bele reajusta fali orsamentu iha ministériu balun ne’ebé la gasta,” nia tenik.

Nia fó ezemplu, hanesan iha kapitál dezenvolvimentu ne’ebé mak projetu balun identifika katak iha tinan 2013 to’o agora aloka hela de’it osan maibé la gasta hanesan projetu retensaun, bele foti fali osan ne’e hodi taka ba ministériu sira ne’ebé presiza atinje meta.

“Atu hamosu orsamentu retifikativu depende ba desizaun ezekutivu, to’o tinan klaran presiza haree meta importante ne’ebé hakarak atinje iha orsamentu retifikativu tanba natureza orsamentu bazeia ba programa ninia foku ba meta ourezultadu,” Ofisíal UPMA tenik.

Iha biban ne’e, UPMA fó hanoin ba ministériu sira ne’ebé mak sei ko’a orsamentu 7% tenke konsentra ba meta importante tanba ne’e prioridade Governu atu atinje.

MF hasai ona sirkulár númeru 01VIII/GMF/2021-02 iha loron 02 fevereiru, ne’ebé orienta atu kada membru Governu tenke identifika dotasaun orsamentál ho montante 7% husi totál orsamentu instituisaun, atu transfere ba fundu COVID-19 hodi halo pagamentu despeza programa Cesta Bázika.

Sirkulár ne’e bazeia ba deliberasaun Konsellu Ministru iha loron 29 janeiru, liuhosi proposta husi Ministru Koordenadór Asuntu Ekonómiku, Joaquim Amaral no Ministru Finansa, Rui Augusto Gomes, kona-ba orientasaun polítika sira relasiona ho ezekusaun programa Cesta Bázika.

Jornalista: Antónia Gusmão

Editora: Julia Chatarina

1 KOMENTÁRIU

  1. husu ba Ministerio Finansas aku lebel ku’a ami nia osan, tanba programa cesta bazika ne’e governu nian, ami ba MF atu aumenta tan ami nia osan ou salario laos atu ku’a fali.

HAKEREK NO HATÁN

Please enter your comment!
Please enter your name here