Prezidente Komisaun C, Deputada Maria Angélica Rangel. Imajen TATOLI/Evaristo Soares Martins.

DILI, 11 fevereiru 2021 (TATOLI)–Prezidente Komisaun C (Finansa Públika), Deputada Maria Angélica Rangel no Eis Prezidente Komisaun C, Deputada Maria Fernanda Lay, diferensa ideia kona-ba desizaun Governu ko’a osan 7% kada ministériu hodi haforsa implementasaun programa cesta bázika.

Prezidente Komisaun C, Deputada Maria Angélica Rangel hateten, lei Orsamentu Jerál Estadu (OJE) 2021 fó dalan hela tanba iha artigu ida sita kona-ba alterasaun ba OJE.

“Ha’u hanoin lei mós fó dalan, iha lei Orsamentu Jerál Estadu (OJE) 2021 nian ne’ebé mak iha artigu ida iha-ne’ebá sita kona-ba alterasaun ba OJE. Ami-nia kompenténsia la hanesan, ami aprova osan fó ezekutivu mak ezekuta,” Prezidente Komisaun C ne’e informa ba jornalista sira iha resintu Parlamentu Nasionál, kinta ne’e.

Eis Prezidente Komisaun C-PN, Fernanda Lay. Imajen Tatoli/António Gonçalves

Maibé, Eis Prezidente Komisaun C, Deputada Maria Fernanda Lay, hakfodak ho desizaun ezekutivu nian tanba ko’a fali orsamentu kada ministériu nian.

Nia konsidera desizaun Governu nian prezudika orsamentu bazea ba programa (Orçamento por programa).

“Ha’u hakfodak tanba Governu mai ho nia polítika ho orsamentu por programa maibé agora programa ne’ebé atu ko’a ne’e, ha’u hanoin Ministériu Finansa tenke klaru. Labele, nia hateten dehan ko’a de’it hosi kategória, saláriu no vensimentu no kapitál dezenvolvimentu labele book. Kapitál menór, bens servisus, tranferensia, bele book,” Membru Komisaun C ne’e hateten.

Deputada Bankada CNRT ne’e esplika saldo ne’ebé tranzita hosi 2020 ba 2021 boot, mezmu momentu debate orsamentu sira dehan katak presiza.

Maibé Bankada CNRT deteta, tanba orsamentu boot nia ezekusaun fulan rua de’it tanba Governu tuir sistema taka iha 15 novembru maibé estende.

“Ita-nia polítika orsamentu por programa ne’e loos ka mai bosok de’it parlamentu,” nia lamenta.

Eis Prezidente Komisaun C ne’e dezafia Unidade Pleneamentu, Monitorizasaun no Avaliasaun (UPMA) atu fó esplikasaun ho klaru ba públiku.

“Se hamenus ka hasa’e tenke ba orsamentu retifikativu no labele liuhosi sirkulár ko’a fali hosi ministériu sira-nia osan,” Deputada Fernanda Lay fundamenta.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here