Defensor Públiku Jerál, Câncio Xavier. Imajen Tatoli/Nelson de Sousa

DILI, 11 fevereiru 2021 (TATOLI)-Defensoria  Públiku sei disemina hodi habelar liután informasaun kona-ba ninia misaun ka papél ba komunidade sira bele hatene liután servisu defensoria.

Defensor Públiku Jerál, Câncio Xavier, hateten  atividade diseminasaun  refere antes ne’e liu hosi projetu pilotu  klínika asesu justisa ne’ebé hetan apoiu hosi parseiru sira hala’o tiha ona no mós Ministériu Justisa (MJ) liuhosi Diresaun Direitu Umanu no Sidadania, Provedoria Direitu Umanu no Justisa (PDHJ) sosiedade sivíl mós kontribui hodi disemina kona-ba papél defensoria nian fó asisténsia direitu lejítimu ba sidadaun bainhira hasoru prosesu justisa.

Notísia Relevante : Defensoria Públiku sei koloka ofisiál justisa vizita prizaun

Nia dehan, durante ne’e servisu defensoria presta ona servisu sira hodi fó asisténsia legál ba sidadaun, maibé presiza nafatin disemina knaar liga ba estatutu Defensoria Públika ho  kódigu prosesu penal, prosesu sivíl nune’e sidadaun sira  iha koñesimentu liután iha setór justisa.

“Ita iha planu se iha  nesesidade sei disemina nafatin servisu Defensoria Públika ho lei sira hanesan kódigu prosesu penál, sivíl  ba komunidade kona-ba misaun atu fó asisténsia direitu lejítimu ba sidadaun hotu ne’ebé buka justisa,” Defensor Públiku Jerál, Câncio Xavier, informa  ba Agência TATOLI iha nia kna’ar fatin, Dili, kinta ne’e.

Nia hatutan, atu demonstra katak defensoria nia misaun atu fo asisténsia ba ema sidadaun hotu ho gratuita  seim hetan pagamentu onoráriu ne’ebé iha konstituisaun konsagra ona.

Nia hateten, ho diseminasaun ne’e  sidadaun sira presiza hatene liután  servisu justisa formal nian hanesan  direitu no devér ne’ebé estipula iha kódigu prosesu penal, sivíl no lei sira ne’ebé iha.

Nia fó ezemplu sidadaun ida sai suspeitu kuandu nia komete krime  iha kualkér nivel prosesu sira presiza hetan atendimentu hosi defensór ida no durante iha depoimentu labele hetan presaun ruma, tanba ne’e bainhira suspeitu ka arguidu hetan detensaun tenke komunika imediatu ba família no  ba defensór ida atu bele fó asisténsia ba sira.

Defensór Públiku Jerál Câncio Xavier, hateten hanesan mós iha prosesu lei sivíl  liu hosi dalan ne’ebé rekere sidadaun sira nia direitu ba justisa hanesan Tribunál.

Nia nota  katak iha komunidade balun iha  konflitu rai labele rezolve hakarak ba Tribunál (dalaruma sira hateten ba Tribunál so iha osan mak bele ba hodi defende) maibé defensoria iha atu fó asisténsia ho gratuita.

Jornalista   : Nelson de Sousa  

Editór        : Francisco Simões

HAKEREK NO HATÁN

Please enter your comment!
Please enter your name here