Osan Dolar Amerikanu. Imajen/Espesiál

DILI, 11 fevereiru 2021 (TATOLI)–Ofisiál Unidade Planeamentu, Monitorizasaun no Avaliasaun (UPMA), Deonísio dos Santos, informa dadus funsionáriu sira-nia diferente nune’e afeta ba saláriu tama tarde.

“Kona-ba saláriu no vensimentu iha problema espesífiku tanba iha sistema maka tenke ajusta dadus molok alokasaun orsamentu iha programa Dalan ba Futuru. Sistema sira ne’e mak SIGAP ne’ebé iha Komisaun Funsaun Públika (KFP), dadus payroll ne’ebé Ministériu Finansa (MF) uza no dadus funsionáriu ministériu nian. Dadus tolu ne’e diferente nune’e afeta ba montante orsamentu,” Ofisiál UPMA, Dionísio dos Santos relata ba Agência TATOLI iha ninia knaar fatin, Palásiu Governu, kinta ne’e.

Notísia relevante: Husi funsionáriu 43.351, falta 144 maka seidauk simu saláriu janeiru

Kuandu dadus funsionáriu entre funsaun públiku ho ministériu la hanesan maka tezouru hasoru difikuldade, tanba ne’e presiza halo halo re-ajustamentu dadus no ida-ne’e sei lori tempu kleur, tanba dadus sira husi ministériu no KPF tenke atualiza iha payroll.

“Ministériu sira mak ba atualiza la’ós UPMA. Ami hatene mak alokasaun orsamentu nível agregadu de’it, katak totál hira mak presiza ba saláriu vensimentu funsionáriu tomak, maibé bainhira aloka osan iha sistema payroll, la envolve UPMA tanba sistema iha MF la’ós iha Dalan ba Futuru,” nia akresenta.

Ministériu tenke dezagrega fali osan iha payroll tuir númeru funsionáriu iha internál ministériu idaidak ninian.

“Tanba ne’e maka kona-ba alokasaun saláriu laiha ligasaun ho sistema UPMA. Tanba problema dadus la hanesan ne’e maka UPMA lakohi halo ligasaun. Antes tenta liga ho sistema SIGAP husi KFP maibé ami haree mosu problema, tanba ne’e deside lakohi,” nia hatutan.

Sorin seluk, Ofisiál ne’e hateten orsamentu iha tanba orsamentu iha 2020 nian ne’ebé la gasta hotu sei iha, tanba ne’e la presiza foti osan iha Banku Sentrál Timor-Leste (BCTL, sigla portugés).

“Tuir lei katak kuandu saldo ne’e seidauk tún ba millaun $200 maka labele foti osan. Haree ba saldo ne’e sei iha millaun $200-resin maka labele foti tanba ne’e kontra lei,” nia subliña.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here