Diretór Jerál Empregu SEPFOPE. Paulo Alves Imajen TATOLI/Egas Cristovão

DILI, 10 fevereiru 2021 (TATOLI)—Diretór Jerál Empregu, Sekretaria Estadu Formasaun Profisionál no Empregu (SEFOPE), Paulo Alves, informa Sentru Formasaun Exelente sei okupa rai ektare 21, tanba ne’e daudaun sei haree ba dezeñu tanba iha mudansa.

“Kona-ba dezeñu, antes ne’e okupa rai ektare 27, maibé tun fali ba ektare 21. Tanba  ne’e, presiza halo estudu viabilidade foun, nune’e bele prevee fali iha orsamentu,” Diretór ne’e informa, iha edifísiu SEFOPE, Caicoli, kinta ne’e.

Tuir Dirijente ne’e, sei harii sentru formasaun ne’ebé ho kualidade, tanba ne’e presiza iha estudu viabilidade.

Aleinde ne’e, sei kompleta fasilidade no asesibilidade ba maluk portadór no difisiensia.

“Esperiénsia ne’ebé maka ita hetan iha rai seluk, fatin formasaun iha asesibilidade ba ema ho difisiénsia, tanba ne’e tenke halo sentru formasaun inkluziva. Dezeñu tenke haree didi’ak atubele prevee iha orsamentu 2022, ita labele halo kálkulu harii uma hira, kuartu hira, tanba ne’e buat hotu tenke halo estudu,” nia akresenta.

Daudaun, parte tékniku sira halo hela diskusaun ba preparasaun harii sentru formasaun ne’ebé tuir planu sei harii iha Metinaro.

“Preparasaun estabelesimentu sentru formasaun, halo ona identifikasaun rai hamutuk ho Terra no Propriadade. Tanba ne’e, tékniku sira sei tuur hamutuk hodi ko’alia kona-ba proposta estudu viabilidade atu rekruta tan espertu halo dezeñu ,” nia hatutan.

Orsamentu ba estudu viabilidade hatama ona ba Ajénsia Dezenvolvimentu Nasionál (ADN) no fundu infraestrutura, ne’ebé bainhira aprova sei lori ba SEFOPE atu halo rekrutamentu ba espertu.

Tanba impase polítika, proposta orsamentu ne’ebé maka VIII Governu aprezenta iha faze dahuluk antes ne’e xumba iha tinan 2019 no 2020, ne’ebé prevee orsamentu hamutuk millaun $15 atu halo dezeñu no konstrusaun.

“Ami ba konsulta ho Terras no Propriadade kona-ba kondisaun rai maibé iha mudansa oituan. Tanba ne’e, prejudika oituan ba dezeñu no presiza halo dezeñu foun,” nia tenik.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here