Prezeidente PN, Aniceto Longuinhos Guteres Lopez. Imajen TATOLI /Egas Cristóvão.

DILI, 10 fevereiru 2021 (TATOLI)–Prezidente Parlamentu Nasionál (PPN), Deputadu Aniceto Longuinhos Guterres Lopes, sei fó resposta ba Tribunál Rekursu kona-ba fiskalizasaun abstrata ba Orsamentu Jerál Estadu (OJE) tinan fiskál 2021.

Notísia Relevante: PN sei hatán notifikasaun TR kona-ba fiskalizasaun abstrata ba OJE 2021

“Tempu ha’u-nia prazu hotu aban. Tanba ne’e, ohin, ha’u tenke submete resposta ba Tribunál Rekursu,” Prezidente Parlamentu Nasionál, Aniceto Longuinhos Guterres Lopes, informa ba jornalista sira iha varanda prinsipál Parlamentu Nasionál, kuarta ne’e.

Iha kazu ne’e, Bankada Congresso Nacional de Reconstrução de Timorensse (CNRT) husu fiskalizasaun abstrata ba TR tanba kestiona legalidade OJE 2021.

“Ha’u sei haree (halo leitura) depois haruka ba (Tribunál Rekursu). kona-ba resposta ne’e konfidensiál no Tribunál mak sei hatene,” nia subliña.

Nia akresenta, maske Xefe Estadu promulga ona OJE 2021 maibé deputadu balun kestiona ne’e normál.

“Kestiona orsamentu no rekere inskonstitusionlidade ne’e normál tanba Tribunál mak sei tetu,” nia hateten. 

Prezidente Parlamentu Nasionál ne’e hateten, ho rekerimentu bankada CNRT ba TR la fó impaktu ba ezekusaun orsamentál tanba lei ne’ebé parlamentu aprova ne’e asegura nesesidade povu nian.

“Tribunál mós sei haree situasaun ne’e,” PPN ne’e fundamenta.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here