Prezidente Institutu Politékniku Betano (IPB), Acácio Cardoso Amaral. Imajen Tatoli/Egas Cristovão

DILI, 10 fevereiru 2021 (TATOLI)—Ministru Ensinu Superiór Siénsia no Kultura (MESSK), Longuinhos dos Santos, estende mandatu Prezidente Institutu Politékniku Betano (IPB), Acácio Cardoso ba fulan neen hodi hein prosesu eleisaun Prezidente foun.

Longuinhos dos Santos esplika, oras ne’e daudaun IPB sei utiliza estatutu provizóriu, tanba ne’e bainhira mandatu Prezidente IPB termina, automatikamente sei anula hodi hein prosesu eleisaun ba kandidatu foun.

Notísia Relevante:IPB propoin millaun $1.3 hari’i edifísiu foun

“Mandatu Prezidente IPB nian termina tiha ona, maibé tenki estende hodi hein prosesu tuir-mai,” Governante ne’e ko’alia ba jornalista sira iha Palásiu Governu, kuarta (10/02).

Alende ne’e, Prezidente IPB, Acácio Cardoso via telefónika informa, ninia mandatu kontinua estende ba fulan neen hodi hein prosesu eleisaun no pose ba Prezidente foun.

Nia dehan, oras ne’e daudaun Konsellu Jerál IPB foin halo preparasaun atu aprova regulamentu ba eleisaun Prezidente nian, tanba ne’e, másimu bele to’o fulan neen foin bele entrega knaar ne’e ba Prezidente foun.

“Loloos ne’e ha’u-nia mandatu termina tiha ona iha loron 31 janeiru, maibé sei estende hodi hein to’o Prezidente foun simu pose,” Prezidente ne’e hateten.

Acácio mós esplika kona-bá prosesu katak, bainhira aprova tiha regulamentu ba eleisaun nian, Konsellu Jerál IPB sei aprezenta ba MESSK hodi bele públika iha Jornál da Repúblika, nune’e bele loke inskrisaun ba kandidatu sira ne’ebé atu konkorre ba vaga ne’e.

“Ninia prosesu sei la’o tuir regulamentu. Tanba momentu ne’ebá Konsellu Jerál seidauk iha, entaun ha’u-nia nomeasaun ne’e liuhosi despaixu Ministru. Agora Konsellu Jerál iha ona, Prezidente foun tenke liuhosi eleisaun hanesan ho eleisaun ba reitór UNTL,” nia subliña.

Entretantu, Acácio Cardoso lidera IPB durante tinan haat hahú hosi fevereiru 2017 to’o 31 janeiru 2021. 

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here