Membru Governu 1975. Imajen/Espesiál.

DILI, 10 fevereiru 2021 (TATOLI)—Xefe Kaza Sívil Prezidente Repúblika, Francisco Vasconcelos hateten, ohin, halo konsulta ho reprezentante família hosi membru Governu 1975 ne’ebé simu pose iha 30 novembru 1975 ne’e, konkorda atu sei harii memorial ida ba membru Governu 1975 iha resintu Palásiu Nobre, Lahane, Dili.

“Iha 30 novembru 1975, membru Governu hamutuk na’in-20 simu pose iha Palásiu Nobre Lahane hafoin Timor-Leste deklara ninia independénsia iha 28 novembru. Atu hanoin hikas loron istóriku ne’e, Prezidénsia Repúblika serbisu hamutuk ho Centro Nacional Chega (CNC) sei harii memoriál ida ba membru Governu 1975. Ita presiza prezerva eventu istóriku ne’e,” Xefe Kaza Sívil, Francisco Vasconcelos hateten liuhosi komunikadu imprensa ne’ebé Agência Tatoli asesu, kuarta ne’e.

Nia hateten, reprezentante família hosi membru Governu 1975 ne’ebé marka prezensa iha reuniaun ne’e apresia tebes inisiativa hosi Prezidénsia Repúblika hodi la haluha eroi sira-ne’ebé fó nia vida tomak ba luta independénsia Timor-Leste nian. 

Prezidénsia Repúblika, tuir nia, halo ona konsulta ba membru Governu 1975 ne’ebé sei moris hanesan Mari Alkatiri, Ramos Horta no Abílio Araújo hodi rona hanoin sira kona-ba planu atu harii memoriál ne’e.

Reprezentante membru Governu 1975 no Prezidente no funsionáriu CNC hasai retratu hamutuk ho xefe kaza sívil. Imajen/Mídia PR.

Xefe Kaza Sívil ne’e informa, hafoin rona hanoin sira hosi reprezentante família hosi membru Governu no sira-ne’ebé moris sei informa fila-fali ba Prezidente Repúblika atu foti desizaun ba memoriál ida-ne’e.

“Palásiu Nobre Lahane sai fatin ba serimónia investidura Prezidente Repúblika, Francisco Xavier do Amaral, leitura ba Konstituisaun RDTL 1975 no pose ba membru Governu na’in-20,” nia informa.

Membru Governu sira-ne’ebé simu pose iha 30 novembru 1975 mak Prezidente Repúblika Francisco Xavier do Amaral, Primeiru Ministru Nicolau dos Reis Lobato, Ministru  Estadu ba Asuntu Polítiku Mari Bim Amude Alkatiri, Ministru  Estadu ba Asuntu Ekonómiku no Sosiál Abílio da Conceição A. de Araújo, Ministru Koordenasaun Ekonómika no Estatístika José Gonçalves,  Vise-Ministru  Koordenasaun Ekonómika no Estatístika Hélio Sanches Pina, Ministru  Finansa Juvenal Maria de Fatima Inácio,  Ministru Komunikasaun no Transporte  Eduardo Carlos dos Anjos.

Vise-Ministru Komunikasaun no Transporte Domingos da Costa Ribeiro, Ministru Defeza Nasional  Rogério Tiago de Fatima Lobato, Vise-Ministru  Defeza Nasionál  Guido Diamantino da Conceição Soares, Vise-Ministru Defeza Nasionál Hermenegildo Alves, Ministru Administrasaun Interna no Seguransa Alarico Jorge G. Fernandes, Vise-Ministru  Administrasaun Interna no Seguransa  Fernando de A. Carmo, Ministru Justisa António Duarte Carvarino.

Ministru Relasaun Esterna no Informasaun José Manuel Ramos Horta, Vise-Ministra  Relasaun Esterna no Informasaun  Guilhermina L. S. de Araújo,  Ministru Traballu no Previdênsia Vicente Manuel dos Reis, Vise-Ministru  Traballu no Previdênsia Guido Valadares no  Ministru Edukasaun no  Kultura Hamis Bin Limar Bassarewan.

Jornalista: Osória Marques 

Editór: Cancio Ximenes

PUBLISIDADEiklan

1 KOMENTÁRIU

  1. Nee hanoin nebe diak e tem que realiza duni tamba hare ba momento nee iha duni ninia sentido nebe fundamental no klean tebes ba processo libertasaun patria e povo. Iha mos hanoin ruma katak iha futuro bainhira harii duni iha resinto Palasiu Nobre karik husu para bele harii iha espasu balun nebe bele fo acesso ba publiku ou se lae fo acesso deit publiku iha lorn komemorasaun ofisial ruma atu nune publiku bele ba halo visita e hare besik liu memorial nee. ikus liu atu fo hanoin mos katak karik loke duni ba publiku hare mos controlo no seguransa nebe diak atu nune fatin memorial nee bele sai farin nebe diak e evita atu labele uza ho irresponsabilidade.

Leave a Reply to Filomeno Cancel reply

Please enter your comment!
Please enter your name here