Ministru Administrasaun Estatál, Miguel Pereira de Carvalho. Imajen TATOLI/Egas Cristovão

DILI, 10 fevereiru 2021 (TATOLI)Ministériu Administrativu Estatál (MAE) simu ona proposta husi komunidade, ho naran tolu atu transforma suku Hatolia B, iha munisípiu Ermera ba postu administrativu.

Dadaun ne’e, ekipa prepara ona proposta revizaun ba lei númeru 11/2009, loron 07 outubru, kona-ba devizaun administrativa territóriu atu halo transformasaun ba área sira ne’ebé prenxe rekezitu postu no munisípiu sira.

“Komunidade suku Hatolia B propoin naran tolu hanesan  postu administrativu Fatu-Besi, Dato-Lima, no ikus liu ha’u simu naran mak ba postu administrativu Hatolia B,” Ministru Administrasaun Estatál, Miguel Pereira de Carvalho, hateten iha Pálasiu Governu, kuarta ne’e.

Governante ne’e infroma, tempu besik, Konsellu Ministru sei halo deliberasaun ba proposta naran tolu, hafoin transforma ba postu administrativu.

“Naran tolu ne’e sei deside iha Konsellu Ministru, atu hili naran ida loloos no tuir ajenda kuarta semana oin Konsellu Ministru hahú halo deliberasaun,” nia tenik.

Komunidade iha Hatolia B preparadu atu sai postu administrativeu rasik tanba ein termu populasaun boot no jeográfika mós sira iha edifísiu liuliu infraestrutura atu asesu ba postu Hatolia A.

Kritéria atu suku ida sai postu administrativu maka presiza haree ba totál populasaun, área jeográfika, potensiál rekursu umanu no rekursu naturál iha área refere.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here