Prezidente Komisaun B (Negósiu Estranjeiru, Defeza no Seguransa), José Agostinho Sequeira ‘Somotxo’, Imajen/Dok.Tatoli

DILI, 10 fevereiru 2021 (TATOLI)–Komisaun A (Justisa no Konstitusionál) no Komisaun B (Negósiu Estranjeiru, Defeza no Seguransa), deside sumba proposta-lei Númeru 19/V (2ª)-alterasaun dahuluk Lei Númeru 11/2017, 24 maiu kona-ba Lei Migrasaun no Azilu tanba konfronta ho Konstituisaun RDTL.

Notísia Relevante:  Komisaun B sei haree proposta alterasaun lei migrasaun no azilu

Prezidente Komisaun B (Negósiu Estranjeiru, Defeza no Seguransa, Deputadu José Agustinho Sequeira ‘Somotxo’, haktuir, proposta-lei Númeru 19/V (2ª)-alterasaun dahuluk lei Númeru 11/2017, 24 maiu kona-ba Lei Migrasaun no Azilu ne’e tama iha 2020 liubá.

“Proposta-lei nee Komisaun A no B mak haree, ne’ebé Governu atu altera artigu 10, 11 no 57 maibé Komisaun A nia rekomendasaun klaru katak alterasaun ne’e konflitu ho ita-nia konstituisaun. Signifika lalika altera mantein nafatin anteriór (orijinál),” Prezidente Komisaun B ne’e informa ba Agência TATOLI iha resintu Parlamentu Nasionál, kuarta ne’e.

Nia haktuir, razaun Governu liuhosi Ministériu Interior aprezenta proposta alterasaun ba Lei Migrasaun no Azilu nu’udar alternativa hodi substitui deklarasaun Estadu Emerjénsia.

Maibé tuir Prezidente Komisaun B ne’e hateten, iha Timor-Leste lei hotu-hotu laiha dalan atu suspende ema-nia liberdade, direitu no garantia.

“Tán ne’e mak só liuhosi deklarasaun Estadu Emerjénsia. Se ita altera signifika ita konfronta ho ita-nia Konstituisaun RDTL. Ami rekomenda ona konkluzaun liuhosi relatóriu no paresér, agora kompete ba plenária atu deside. Komisaun A no B nia desizaun deside sumba tiha maibé sei lori ba plenária atu deside,” Prezidente Komisaun B afirma.

Nia dehan, Governu bele propoin proposta alterasaun hodi atualiza situasaun sosiál no avolusaun polítika maibé alterasaun ne’e labele foti kompeténsia artigu 25 iha Konsituisaun RDTL.

“Dala-ida tán, ha’u hateten altera ho buat seluk, altera atu suspende direitu no liberdade ne’e, só konstituisaun fó dalan tanba kualkér proposta alterasaun labele foti kompeténsia ida-ne’e,” Deputadu Bankada FRETILIN ne’e fó hanoin ba na’in ba proposta alterasaun ne’e.

Tanba, nia dehan, Governu nia intensaun husu atu taka fronteira nu’udar dalan-ida atu ema labele tama-sai fronteira, maibé kuandu taka ona ne’e linguajen ida restrinje ema-nia direitu no liberdade, tanba ne’e laiha nesesidade atu restrinje. 

Entretantu, Governu propoin proposta-lei ne’e husu atu altera artigu 10 (postu fronteira sira), iha kapítulu III (tama, permanénsia, sai hosi territóriu nasionál), sesaun I hosi Lei Migrasaun no Azilu. 

Nune’e mós Governu husu altera artigu 11 (direitu tama no sai). Governu mós husu Parlamentu Nasionál atu altera artigu 57 (dispensa autorizasaun ba rezidénsia).

Maibé Prezidente Komisaun B ne’e argumenta, artigu tolu ne’ebé Governu propoin ne’e konfronta ho Konstituisaun RDTL tanba ne’e la nesesáriu.

Prezidente Komisaun B ne’e labele esplika klaru kona-ba konteúdu hosi proposta alterasaun ne’e maibé sei halo leitura liuhosi relatóriu no paresér Komisaun A no B nian iha plenária, PN semana oin.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here