Pájina inisiál portál munisipál. Imajen/Espesiál

DILI, 10 fevereiru 2021 (TATOLI)Governu liuhosi reuniaun Konsellu Ministru aprova projetu dekretu-lei Governu, ne’ebé aprezenta husi Ministru Administrasaun Estatál, Miguel Pereira de Carvalho, kona-ba kriasaun portál munisipál no estabelese regra jerál sira kona-ba ninia funsionamentu.

“Portál munisipál fornese informasaun oin-oin relasiona ho munisípiu ida-idak, ne’ebé fó asesu ba públiku ho gratuitu, kontein dadus no informasaun sira kona-ba bein no servisu husi órgaun no servisu administrasaun públika lokál, investimentu públiku ne’ebé hala’o iha munisípiu ida-idak, ka levantamentu no estatístika oin-oin mai husi instituisaun públika,” Ministru Prezidénsia Konsellu Ministru, Fidelis Manuel Leite Magalhães, informa hafoin ramata reuniaun ezekutivu iha Palásiu Governu, kuarta ne’e.

Tuir Portavós Governu, antes ne’e projetu dekretu Governu ne’e sai ona hanesan alvu deliberasaun iha reuniaun ezekutivu, maibé tanba introdusaun ba alterasaun substansiál sira iha faze redasaun ikus nian, maka presiza atu submete ba iha deliberasaun foun.

Daudaun, portál munisipál funsiona ona http://www.portalmunicipal.gov.tl/ no disponível ba lian inglés, tetun no portugés maibé foin funsiona ho lian inglés.

Portál ne’e disponibiliza públika asesu informasaun munisipál ho forma atu apoia progresu no dezenvolvimentu munisipál iha termu sosiál, ekonómiku, infraestrutura no kulturál.

Portal ne’e konstitui mós hanesan instrumentu sentrál atu rekolla informasaun ho forma koerente.

Informasaun munisipál akompaña ho estatístika iha área hanesan edukasaun, saúde, seguransa alimentár, obra públika no transporte, bee no saneamentu báziku no ambiente, agrikultura, jestaun ba merkadu no turizmu, asaun sosiál, protesaun sivíl, jestaun ba dezastre naturál, rejistu noariadu no serbisu kadastrál no apoiu ba organizasaun non governamentál no organizasaun komunitária sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here