Segundu Komandante Operasaun Sala Situasaun COVID-19, Brigadeiru Jenerál, João Miranda “Aluc Descartes”, Koordenadór Estadu Maiór Kapitaun Mar-de-e- Guerra, Donaciano Costa Gomes “Pedro Klamar Fuik”, Xefe Estadu Maiór F-FDTL Koronél Calisto Santos “Coliati” halo vizita haree direita abitante sira iha kuarentena Batugade-Bobonaro. Imajen/IDN

DILI, 10 fevereiru 2021 (TATOLI)-Primeiru Ministru, Taur Matan Ruak, fó orientasaun ba Sentru Integradu Jestaun Krize (CIGC) hodi koloka Forsa Unidade Territoriál kompostu hosi FALINTIL-Forsa Defeza Timor-Leste (F-FDTL) no Polísia Nasional Timor-Leste (PNTL) hamutuk batallaun ida hodi reforsa seguransa iha liña fronteira terrestre no tasi nian.

Prezensa forsa sira ne’e hodi apoiu servisu Unidade Patrullamentu Fronteira (UPF) no Unidade Espesiál Polísia (UPF) atu garante seguransa hodi evita abitante sira halo viajen ilegál  mai territóriu Timor-Leste liuhosi rai-maran no tasi.

Forsa batallaun ida-ne’e sei hala’o sira-nia misaun servisu asegura implementasaun Estadu Emerjénsia (EE) da-sanulu iha liña fronteira Munisípiu Bobonaro, Covalima no Rejiaun Administrativu Espesiál Oe-cusse Ambeno (RAEOA).

Atu haree besik liután dezafiu no kondisaun servisu ekipa forsa konjunta ne’e, iha  tersa (09/02), Segundu Komandante Operasaun Sala Situasaun COVID-19, Brigadeiru Jenerál, João Miranda “Aluc  Descartes”, Koordenadór Estadu Maiór Kapitaun Mar-de-e-Guerra Donaciano Costa Gomes “Pedro Klamar Fuik”,  Xefe Estadu Maiór F-FDTL Koronél Calisto Santos “Coliati”, Komandante Operasionál Intervensaun Bombeiru, Paul Oliveira Maia, halo vizita diretamente ba Postu Kuarentena iha Batugade hodi observa sidadaun  na’in-36 ne’ebé hela iha kuarentena.

Ekipa konjunta ne’e halo mós identifikasaun ba zona ilegál, no observa postu UPF, identifika fatin hodi koloka forsa unidade territoriál no fatin kuarentena no hasoru malu mós ho Prezidente Autoridade Munisipál Bobonaro, komandante PNTL hodi diskute kooperasaun servisu asegura seguransa.

“Forsa unidade territoriál nia misaun prinsipál  mai apoia no ajuda ita nia autoridade munisipál ho polísia ho postu tátiku sira kolokadu iha liña fronteira,  oinsá bele apoiu Ministériu Saúde, kona-ba implementasaun prevensaun sortu COVID-19 iha rai laran no fó hanoin ativu hala’o sosializa hodi hasa’e komprensaun sidadaun sira,” hateten Segundu Komandante Operasaun Sala Situasaun COVID-19, Brigadeiru Jenerál, João Miranda “Aluc  Descartes, liuhosi nota komunikadu ne’ebé  Agência TATOLI, kuarta ne’e.

Brigadeiru Jenerál Aluc hatutan, Estadu hakarak forsa sira ne’e servisu maka’as hodi antesipa movimentu ilegál iha fronteira, tanba hahú dezembru 2020, propagasaun COVID-19 aumenta maka’as iha nasaun viziñu Atambua.

Ekipa SIGC rasik prepara mós apoiu lojístika sira hodi suporta servisu forsa konjunta  sira iha terrenu.

Koordenadór Estadu Maiór Sala Situasaun CIGC, Capitão Mar-de-e- Guerra, Pedro Klamar Fuik” husu ba autoridade lokál sira koopera nafatin ho forsa konjunta sira.

Jornalista    : Eugénio Pereira

Editór           : Francisco Simões

HAKEREK NO HATÁN

Please enter your comment!
Please enter your name here