Prezidente Autoridade Munisípiu Baucau, Olivio “Bou Lesa” Freitas, halo juramentu iha serimónia tomada de pose ne’ebé akompaña hosi Pároku Manuel Ximenes, SDB. Imajen/Mídia MAE.

DILI, 09 fevereiru 2021 (TATOLI)—Prezidente Autoridade (PA) Munisípiu Baucau, Olívio Freitas ‘Bou Lesa’, rejeita deklarasaun hosi reprezentante povu iha uma fukun Parlamentu Nasionál kona-ba ezonerasaun ba funsionáriu kontratadu iha Administrasaun Munisipál Baucau.

Olivio Freitas ‘Bou Lesa’ hatutan, funsionáriu kontratadu sira-ne’ebé Prezidente Autoridade Munisípiu Baucau ezonera hamutuk na’in-98 ne’e la loos, tanba molok nia simu pose no hala’o knaar ne’e, funsionáriu hirak ne’e ninia kontratu ramata ona iha 31 dezembru 2020.

“Ha’u rejeita deklarasaun hosi membru Parlamentu Nasionál balun dehan ha’u halo ezonerasaun ba funsionáriu kontratadu sira iha Administrasaun Munsipál Baucau, ne’e la loos. Tanba, ha’u simu pose iha loron 12 janeiru no ha’u hala’o ha’u-nia servisu dahuluk iha loron 13 janeiru 2021, kontratadu sira-ne’e nia kontratu ramata iha loron 31 dezembru 2020. Entaun, halo oinsá mak ha’u bele enzonera sira. Ne’e, la loos,” Olivio Freitas ‘Bou Lesa’ hateten ba Agência TATOLI, via telefónika, tersa ne’e.

Nia hateten, informasaun ne’ebé deputadu balun foti iha plenária iha loron 02 fevereiru 2021 ne’e, deklarasaun polítika ida ne’ebé la loos tanba kontratu ne’e termina uluk ona mak nia foin simu pose.

Nia esplika, laiha liafuan ezonerasaun tanba funsionáriu kontratadu hirak ne’e asina kontartu no iha kontratu laran ne’e hakerek ho klaru, entaun nia parte tenke haree hikas fali ba ninia prosesu sira-ne’e liuhosi prosesu legal hanesan tuir rekrutamentu ka lae.

“Tanba, buat ida, ha’u lakohi atu bolu malu de’it. Tanba, família bolu malu mai, ha’u lakohi sala ida iha tiha ona, mak ha’u lakohi halo sala tan iha sala ida-nia leten. Ne’e mak buka legalidade ema-ne’ebé mak iha dokumentu kontratu duni no ema-ne’ebé antes laiha kontratu hosi lei númeru 3/2016 marsu, ne’ebé vigora iha 17 ne’e hateten halo kontratu mak nia laiha dokumentu, ha’u tenke haree lai,” nia dehan.

Tanba ne’e, tuir nia, informasaun hosi membru Parlamentu Nasionál balun ne’ebé deklara katak Prezidente Autoridade Munisípiu Baucau ezonera funsionáriu kontratadu, ne’e la loos tanba hirak ne’ebé laiha dokumentu ne’e la tuir prosesu legal.

“Hirak ne’e, ha’u konsidera katak sira la tuir regra Komisaun Funsaun Públika nian. Maibé, ha’u estende fali kontratu ho sira-ne’ebé sei presiza hala’o servisu normál ho ha’u. Ha’u hakarak hateten, ha’u la’ós ezonera ema. Liafuan ezonerasaun ne’e, ema ne’e kaer kargu ruma mak bolu ezonera. Maibé, kontratadu ne’e la’ós ezonera. Funsionáriu kontratadu ne’e barak maibé balun ami estende ona sira-nia kontratu. Buat ne’e tuir prosesu legal, tanba ne’e mak ami foin tama mai, ami tenke buka tuir. Ami lakohi sala iha ona, mai aumenta tan sala,” Bou Lesa hateten.

Prezidente Autoridade ne’e haklaken, iha funsiunáriu kontratadu balun ne’e nia kontratu ramata iha 31 dezembru 2020 maibé nia estende ona balun atu kontinua fali servisu iha Administrasaun Estatál Baucau nian.

“Funsionáriu ne’ebé ami estende tan sira-nia kontaru ne’e mak saneamentu na’in 10 maibé ida moras entaun estende na’in-sia (9), Pesoál Limpeza Esgotu (PLE) nian hamutuk 10, hamoos iha edifísiu laran ne’e feto rua (2) no mane ida. Ami mós estende tan motorista (sofer) inklui tan ajente na’in-10, no mós iha edukasaun na’in-17, postu administrativu no agrikultór balun nu’udár tratorísta estende,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here