Ministru Turizmu, Komérsiu no Indústria, José Lucas do Carmo da Silva. Imajen TATOLI/António Gonçalves

DILI, 09 fevereiru 2021 (TATOLI)Ministru Turizmu, Komérsiu no Indústria (MTKI), José Lucas do Carmo da Silva, akompaña husi Inspetór Jerál Jogu, Domingos da Costa Guterres, hamutuk ho ekipa, hala’o vizita ba Banku Nasionál Komérsiu Timor-Leste (BNCTL, sigla portugés) hodi hametin liután koordenasaun  serbisu.    

Antes ne’e, BNCTL no MTKI selebra ona akordu ida atu asegura fundu garantia husi atividade jogu.

Notísia relevante: MTKI-BNCTL asina akordu garantia operadór jogu iha Timor-Leste

Tanba ne’e, Ministru José Lucas, dehan vizita ne’e atu hametin koordenasaun nu’udar parseiru atu haree ba jogu tradisionál no sosiál.

“BNCTL sai parseiru MTKI hodi apoiu programa negósiu sosiál hanesan atividade jogu, tanba ne’e iha vizita ne’e hasoru malu ho direjente Banku Komérsiu atu ko’alia, diskute, no hametin liután koordenasaun,” Ministru José Lucas relata hafoin ramata enkontru iha salaun enkontru BNCTL, Timor-Plaza, tersa ne’e.

Iha fatin hanesan, Inspetór Jerál Jogu, Domingos da Costa Guterres, hateten akordu ne’ebé antes estabelese ona bele haree liután kondisaun sira ba implementasaun.

Inspetór Jerál Jogu, Domingos da Costa Guterres. Imajen TATOLI/António Gonçalves

“Vizita ne’e atu hametin liña koordenasaun entre parte rua, liuliu ba akordu ne’ebé asina ona iha tinan 2020 liubá, atu haree ba ninia implementasaun liga ba atividade jogu sosiál, kreativu no jogu tradisionál sira ne’ebé mak iha, nune’e ba futuru ami bele iha serbisu di’ak atu garante sustentabilidade ekonomia sosiedade iha futuru, entaun operadór jogu sira tenke kumpre sira-nia direitu no mós dever sai hanesan operadór jogu iha Timór,” Inspetór Jogu dehan.

Hafoin asina akordu ne’e, IJG identifika kestaun balun hanesan tenke iha komunikasaun entre Governu ho operadór jogu sira ho rigór, nune’e bele asegura atividade jogu sira ne’e la’o di’ak no bele hetan informasaun di’ak.

Aleinde ne’e, operadór jogu sira tenke iha inisiativa atu halo planu investimentu ida di’ak ba futuru, ein termu jogu refere bele kontribui ba dezenvolvimentu nasaun.

“Nune’e atividade jogu bele hatan ba interese públiku, ne’ebé mai husi buat lubuk ida hanesan operadór jogu sira ne’e selu taxa di’ak Estadu, bele loke postu serbisu ba sidadaun sira, no bele hadi’a fasilidade públiku sira ne’ebé mak iha, nune’e mós bele halo investimentu iha área turizmu no setór sira seluk,” Domingos subliña.

Sorin seluk, Prezidente Konsellu Administrasaun BNCTL, António Víctor, konsidera enkontru ne’e importante atu atualiza pontu iha akordu ne’ebé iha.

“Ami koordena di’ak liután iha implementasaun akordu ne’ebé antes estabelese ona, tanba banku hanesan parseiru atu apoia programa Governu nian, liuliu Inspesaun Jerál ba Jogu,” nia akresenta.

Tuir dirijente ne’e, daudaun akordu iha prosesu implementasaun no BNCTL prepara ona kondisaun sira hodi implementa.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here