Prokuradór Jerál Repúblika, José da Costa Ximenes. Imajen Tatoli/Dok

DILI, 09 fevereiru 2021 (TATOLI)-Durante janeiru, tinan ne’e, Ministériu Públiku (MP) rejista prosesu krime tama foun (entrada) hamutuk 507.

Prokuradór Jerál Repúblika (PJR), José Ximenes, informa tuir estatístika hosi MP nian to’o iha loron  31 dezembru 2020  iha prosesu kazu 2823 mak pendente iha nivel nasionál no durante iha janeiru 2021 prosesu tama foun 507 kompostu hosi Munisípiu Dili kazu 300, Munisípiu Baucau (77), Munisípiu Covalima (74) no Oecusse (48), inklui hosi kazu balun ne’ebé rejista liu hosi Gabinete Kombate Korrupsaun no Krime Organizadu iha Prokuradoria Jerál Repúblika.

Notísia Relevante : Númeru prosesu iha tribunál hahú redús

Nia dehan, ida ne’e mak situasaun kriminalidade akontese iha nivel nasionál  no hosi númeru kazu pendente no foun ne’ebé tama MP konsege  finaliza ona  prosesu 665.

“Situasaun kriminalidade ba prosesu sira  tama barak, maibé ita finaliza mós prosesu barak,” Prokuradór Jerál Repúblika, José Ximenes, hateten ba jornalista hafoin enkontru ho Prezidente Repúblika (PR), Francisco Guterres “Lú-Olo’’ iha Palásiu Prezidensiál, Dili, tersa ne’e.

Nia  esplika, númeru  kazu sira ne’e maioria ho tipu hanesan ofensa ba integridade fízika, violénsia doméstika no kazu ho númeru natoon mak korrupsaun no krime sira seluk tan.

Xefe Estadu fó apoiu no enkoraja MP atu kontinua hala’o kna’ar atua didi’ak ninia intervensaun la’ós de’it kuantitativu, maibé reforsa kualidade intervensaun ba kriminalidade.

Jornalista   : Nelson de Sousa

Editór        : Francisco Simões 

PUBLISIDADEiklan

HAKEREK NO HATÁN

Please enter your comment!
Please enter your name here