Ministru Ensinu Superiór, Siénsia no Kultura, Longuinhos dos Santos. Imajen/Egas Cristovão

DILI, 09 fevereiru 2021 (TATOLI)—Ministru Ensinu Superiór Siénsia no Kultura (MESSK), Longuinhos dos Santos, deklara sei orienta ekipa ida atu halo verifikasaun bainhira mosu duni irregularidade iha prosesu selesaun ba kandidatu estudante foun ne’ebé atu asesu ba Universidade Nasionál Timor Lorosa’e (UNTL) no Institutu Públiku Betano (IPB).

“Bainhira irregularidade iha duni, ita nia ekipa sei halo fila-fali verifikasaun ida ho justu no transparénsia atu bele haloos tiha polémika ne’e,” Longuinhos dos Santos hateten ba jornalista sira iha salaun Ian Martin INFORDEPE, Matadouru, tersa (09/02).

Notísia Relevante:Estudante 5.582 admitidu ba UNTL no IPB

Governante ne’e klarifika katak, iha diferensa entre rejimi jerál no rejimi oportunidade, tanba rejimi jerál haree-liu bá estudante Ensinu Sekundáriu Jerál no Ensinu Sekundáriu Tékniku Vokasionál ne’ebé aprovadu iha tinan 2019 no rejimi oportunidade fó ba estudante ne’ebé aprovadu iha tinan haat liu-bá.

Ne’e duni, Ministru hatutan, estudante sira ne’ebé la pasa ba rejimi jerál, ne’e tanba bazeia ba sira-nia valór ezame nasionál no rejimi oportunidade bazeia ba rezultadu ezame ne’ebé Komisaun Asesu Engresu Ensinu Superiór (KAEES) selebra ona.

Tanba ne’e, nia foti konkluzaun ida katak, bainhira estudante ho valór bo’ot la pasa, maibé valór ki’ik pasa ho rejimi hanesan no kursu diferensa ne’e lójika.

“Nune’e mós valór bo’ot la pasa, maibé valór ki’ik pasa ho rejimi diferensa ida ne’e mós lójika. Enkuantu, estudante ida ho valór bo’ot la pasa, valór ki’ik pasa ho rejimi no kursu hanesan, ida ne’e mak presija identifika tanba konsidera mosu irregularidade hosi KAEES no tenki prosesa,” Longuinhos subiña.

Ministru ne’e mós deklara prontu atu halo klarifikasaun kona-bá asuntu ne’e ba deputadu sira iha Parlamentu Nasionál (PN).

“Deputadu sira presija duni atu hetan klarifikasaun ho dalan rua de’it. Primeiru, bele liu hosi Ministru Asuntu Parlamentár no Komunikasaun Sosiál. Segundu, depende ba Ministru hakarak halo klarifikasaun direta iha PN kona-bá asuntu ne’e, ha’u prontu halo klarifikasaun,” Ministru Longuinhos hato’o prontidaun.

Entretantu, estudante rejimi jerál no rejimi espesiál ne’ebé admitidu atu asesu ba Ensinu Superiór Públiku UNTL no IPB ba tinan akadémiku 2021 hamutuk 5.582 no anunsia hosi KAEES iha sesta (05/02).

Iha loron tuir-mai, Deputadu António da Conceição no David Dias Ximenes liuhosi plenária, husu MESSK atu halo klarifikasaun tanba diskonfia mosu irregularidade iha prosesu selesaun, iha ne’ebé estudante balun ho valór boot la admitidu maibé balun ho valór kiik admitidu.

Kona-bá ne’e, KAEES mós klarifika ona katak, estudante barak ho valór boot entre 50 to’o 54 la admitidu iha UNTL no IPB, tanba lakon iha opsaun kursu tolu ne’ebé sira rasik hili.

Notísia Relevante:Estudante ho valór boot lakon iha opsaun hili kursu UNTL

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here