Ministru Edukasaun Juventude no Desportu, Armindo Maia.Imajen/Antonio Goncalves

DILI, 08 fevereiru 2021 (TATOLI)—Atuál Ministru Edukasaun Juventude no Desportu (MEJD), Armindo Maia, serbisu makaas atu finaliza rezolusaun ida ho nia konteúdu atu foti desizaun ba funsionáriu kontratadu na’in 93 ne’ebé to’o ohin loron seidauk serbisu.

Oras ne’e daudaun, ekipa tékniku elabora hela rezolusaun ne’e no bainhira finaliza sei aprezenta ba Konsellu Ministru (KM) tanba iha prova balun hosi rezultadu verifikasaun dokumentu hatudu katak, rekrutamentu ba ajente administrasaun públiku na’in 93 iha tinan 2019, mosu irregularidade.

Notísia Relevante:MEJD hahú prosesa dokumentu funsionáriu kontratadu 93

“Ami elabora hela projetu rezolusaun ida atu lori fali ba KM hodi foti desizaun kona-bá asuntu ne’e, tanba ami halo ona verifikasaun no konsege deteta irregulariadade lubuk ida iha vaga 93 ne’e,” Armindo Maia hateten ba jornalista sira iha Palásiu Governu, segunda (08/02).

Governante ne’e konsidera rezultadu verifikasaun ne’e sizíliu hela, tanba ne’e bainhira aprezenta ona ba KM mak foin bele informa ba públiku.

“Prosesu rekrutamentu ne’e la’ós iha ami-nia tempu, maibé iha Ministra sesante-nia tempu. Tanba iha prosesu irregularidade lubuk ida mak akontese, no ha’u lakohi hateten agora tanba ita hein desizaun KM,” Governante ne’e informa.

Armindo Maia mós husu apoiu ba parte hotu-hotu atu fó hanoin lisuk hodi bele rezolve kestaun ne’e tuir dalan ne’ebé justu.

Entretantu, funsionáriu hirak ne’e tuir teste no pasa iha konkursu ne’ebé hala’o iha tinan 2019 ho grau III to’o V.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here