Embaixadór Austrália iha Timor-Leste, Peter Roberts. Imajen TATOLI/Egas Cristovão

DILI, 09 fevereiru 2021 (TATOLI)–Governu Austrália liuhosi Embaixada iha Timor-Leste, iha kompromisu boot hodi apoia Timor-Leste iha ámbitu kombate pandemia COVID-19 iha Timor-Leste.

Kompromisu ne’ebé nasaun viziñu ne’e fó ba Governu Timor-Leste maka apoiu harii postu seguransa hamutuk haat iha fronteira hodi Polísia Nasionál Timor-Leste (PNTL) bele utiliza kontrola di’ak liután atividade fronteirísu.

“Austrália serbisu hamutuk ho PNTL atu asegura fronteira, tanba ne’e ami-nia ekipa Polísia sei fornese postu seguransa foun haat atu apoiu serbisu Polísia iha fronteira, tanba serbisu seguransa iha fronteira importante tebes,” Embaixadór Austrália iha Timor-Leste, Peter Roberts, hateten hafoin ramata reuniaun ho Primeiru-Ministru, Taur Matan Ruak, iha Palásiu Governu, tersa ne’e.

Iha biban ne’e, diplomata australianu ne’e informa ba Xefe Governu katak Austrália prontu serbisu hamutuk ho Timor-Leste hodi kombate COVID-19.

Antes ne’e, Vise-Ministru Interior, António Armindo, hateten Governu serbisu ho parseiru dezenvolvimentu Austrália sei estabelese tan postu haat ba Unidade Patrullamentu Fronteira (UPF) iha liña fronteira terrestre.

Postu haat ne’ebé sei aumenta, akompaña mós ho númeru UPF hodi reforsa seguransa iha fronteira postu Bobonaro, Covalima no Oé-cusse nian.

Postu hirak ne’e aumenta hodi kompleta postu UPF ne’ebé harii ona hamutuk 30-resin iha liña fronteira terrestre iha territóriu tomak.

Jornalista: Antónia Gusmão

Editora: Julia Chatarina    

HAKEREK NO HATÁN

Please enter your comment!
Please enter your name here