Segundu Komandante Polísia munisípiu Dili, Superintendente Euclides Belo. Imajen TATOLI/ António Gonçalves

DILI, 09 fevereiru 2021 (TATOLI)- Segundu Komandante Polísia Munisípiu Dili, Superintendente Euclides Belo, husu ba inan-aman sira atu kuidadu no bolu atensaun ba oan sira ne’ebé mak halo movimentu sapatu-roda iha estrada públiku.

Komandante Euclides Belo hateten, inan-aman sira tenke bandu oan sira uza sapatu-roda halo fali movimentu iha estrada públiku, tanba esperiénsia hatudu labarik balun hetan soke hosi karreta no motór to’o sofre kanek todan.

Euclides Belo dehan, Roller Sports (sapatu-roda) iha Timor-Leste seidauk bele permite atu uza espasu Estrada públiku no bainhira públiku sira hakarak uza sapatu-roda bele halo movimentu iha fatin desportu sira ne’ebé luan hanesan kampu futeból nian.

“Roller Sports  iha Timor-Leste seidauk eziste, proibidu ba públiku liu-liu ba inan-aman sira tenke bandu oan sira labele uza sapatu-roda halo fali movimentu  iha estrada públiku,” Euclides Belo hateten ba jornalista iha Komandu PNTL, Dili, tersa ne’e.

PNTL liuhosi Seksaun Tránzitu Dili no Tránzitu Nasionál sei halo operasaun iha kapitál Dili no hadau sapatu-rona, inklui bolu inan-aman sira ba edifísiu PNTL hodi responsabiliza ba sira-nia oan bainhira uza sapatu-roda.

PNTL rasik halo ona identifikasaun fatin sira ne’ebé labarik no juventude sira durante ne’e uza ba movimentu sapatu-roda maka iha Comoro, Kristu Rei, Audian, Vila-Verde no área Motaél no Palásiu Governu nian.

PNTL Dili sei halo vizita ba eskola Ensinu Báziku Terseiru Siklu, Ensinu Sekundáriu hodi disemina lei tránzitu nian bandu menoridade kondús transporte.

PNTL husu ba estudante sira ne’ebé to’o ona  idade tinan 17 bele trata ona dokumentu hodi hetan Karta Kondisaun hosi Diresaun Nasionál Transporte Terrestre (DNTP).

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here